सुरुङमा भारत, चीन र कोरियाका उद्धारकर्मी

काठमाडौँ । सरकारले रसुवा र नुवाकोटका विभिन्न जलविद्युत् आयोजनाका सुरुङमा फसेकाहरुको उद्धारमा नेपाली सेनासँगै ३ देशका विशेषज्ञ परिचालित भएको जनाएको छ ।

Watch On

परराष्ट्र मन्त्रालयका अनुसार, भारतको २४ सदस्यीय टनेल उद्धार टोली नेपाली सेनासँग समन्वय गरी चिलिमे र लाङटाङ जलविद्युत् आयोजना क्षेत्रमा खटिएको छ भने चीनबाट आएको ९ सदस्यीय टनेल उद्धार टोली नेपाली सेनासँग समन्वय गरी माथिल्लो त्रिशूली ३ ’ए’ आयोजना क्षेत्रमा परिचालन भएको छ । त्यस्तै कोरियाबाट पनि उद्धार टोली नेपाल आइपुगेको मन्त्रालयका प्रवक्ता लोकबहादुर पौडेलले जानकारी दिए ।

मन्त्रालयले विपद् व्यवस्थापनमा विभिन्न मित्रराष्ट्रबाट अन्तर्राष्ट्रिय प्राविधिक सहयोग प्राप्त भएको जनाएको छ ।

परराष्ट्र मन्त्रालयमा आयोजित नियमित प्रेस ब्रिफिङमा मन्त्रालयका प्रवक्ता पौडेलले खोज तथा टनेल उद्धारका साथै डीएनए पहिचानका क्षेत्रमा अन्तर्राष्ट्रिय प्राविधिक सहयोग प्राप्त भएको जाकारी दिए ।

उनले भारतबाट १९ सदस्यीय डीएनए विश्लेषण विज्ञ टोली २९ अगस्टदेखि कार्यक्षेत्रमा रहेको र चीनबाट ४ सदस्यीय फोरेन्सिक टोलीका साथै सिंगापुरबाट विपद् पीडित पहिचान टोली ल्याउन समन्वय भइरहेको बताए ।

तत्काल पहिचान हुन नसकेका शवहरूको डीएनए नमुना सुरक्षित राखी अन्तर्राष्ट्रिय मापदण्डअनुसार अस्थायी रूपमा गाडिएको मन्त्रालयले जनाएको छ ।

प्रवक्ता पौडेलले क्षति मूल्याङ्कन गरी ’विपद्पछिको आवश्यकता मूल्याङ्कन’ तयार गरिने र सोही आधारमा दीर्घकालीन अन्तर्राष्ट्रिय सहयोग आह्वान गरिने पनि बताए ।