६ हाइड्रोका सुरुङमा उद्धारः के छ प्रगति ?

काठमाडौँ । भोटेकोशी बाढीको आज आठौँ दिन आज पनि रसुवा र नुवाकोटका ६ वटा जलविद्युत् आयोजनाको सुरुङमा उद्धार प्रयास जारी छ । उद्धारमा नेपालीसँगै विदेशी विशेषज्ञहरु पनि संलग्न छन् ।

Watch On

नेपाली सेनाका अनुसार रसुवागढी हाइड्रोमा उद्धार टोली टलेनको करिब १५० मिटरभित्र पुगेको छ भने ठूला चट्टानहरूको कारण त्यहाँबाट भित्र जान सकेको छैन । आज सो क्षेत्रमा पुनः खोज तथा उद्धार कार्य जारी रहेको सेनाले जनाएको छ । 

लाङटाङ हाइड्रोमा पनि विदेशीसहित २५ जनाको संयुक्त खोज तथा उद्धार टोलीले टनेलभित्र करिब १५० मिटरसम्म प्रवेश गरेको छ । 

चिलिमे हाइड्रोमा विदेशीसहितको संयुक्त टोलीले खोज तथा उद्धारको कार्य गरिरहेकोछ भने अपर त्रिशूली १, हाँकुमा नेपाली सेनाको टोलीले खोज तथा उद्धार कार्य गरिरहेको छ । 

त्रिशूली ३ एमा मा नेपाली सेना सहितको ९३ जनाको संयुक्त उद्धार टोली परिचालन गरिएको छ । त्यहाँ ३ वटा स्काभेटर र १ वटा बबक्याट माटो पन्छाई कम्प्रेसर र ब्रेकरबाट ढुंगा फुटाउने कामपछि सुरुङको आउटलेट भेटिएको छ। 

वर्षाको कारण राति जमेको पानीलाई बाहिर फालिएको छ । 

त्रिशूली ३ बीमा नेपाली सेनाको ६१, गैरसैनिक ३ र आयोजनाका प्रबन्ध निर्देशक सहितको संयुक्त उद्धार टोलीले आयोजनाको कार्यालय र निवास पहिचान गरी उक्त इलाकासम्म पुग्न एक्स्काभेटरबाट बाटो बनाउने कार्य भइरहेको नेपाली सेनाले जनाएको छ ।