सेनापति सिग्देल पुगे त्रिशूली थ्री ‘ए’को टनेलमा

काठमाडौँ । प्रधानसेनापति अशोक सिग्देलराज भोटेकोशी बाढीका कारण थुनिएको त्रिशूली थ्री ए जलविद्युत आयोजनाको सुरुङ क्षेत्रमा पुगेर उद्धार कार्यको अवलोकन गरेका छन् ।

Watch On

सो अवसरमा उनले सबै सरोकारवाला निकायबीच प्रभावकारी समन्वय र सहकार्य गर्दै खोज तथा उद्धार कार्यलाई निरन्तरता दिन नेपाली सेनाका उद्धारकर्मीलाई निर्देशन दिए ।

भदौ १० गतेदेखि नै बाढी प्रभावित क्षेत्रमा नेपाली सेना खोजी तथा उद्धारमा सक्रिय छ । पछिल्ला केही दिनयता नेपाली सहितका उद्धारकर्मीहरुले भोटेकोशी र त्रिशूली नदीका जलविद्युत आयोजनाका सुरुङमा थुनिएकाहरुको उद्धार कार्य जारी राखेका छन् ।

सोही क्रममा लाङटाङ हाइड्रोमा विदेशीसहित २५ जनाको संयुक्त खोज तथा उद्धार टोलीले टनेलभित्र करिब १५० मिटरसम्म प्रवेश गरी दुई स्थानमा सानो–सानो प्वाल  बनाई खोजी कार्य भइरहेको सेनाले जनाएको छ ।

त्यस्तै, चिलिमे हाइड्रोमा पनि विदेशीसहितको संयुक्त टोली खोज तथा उद्धारमा परिचालित छ ।

त्रिशूली थ्री एमा ९३ जनाको संयुक्त उद्धार टोलीले ५ वटा एक्स्काभेटर प्रयोग गरी टनेलको आउटलेटमा भरिएको लेदो र माटो हटाएको छ । प्वाल ठूलो बनाउन ब्लास्टिङ गरिएको पनि सेनाले जनाएको छ ।

त्रिशूली थ्री बीमा नेपाली सेनाको ८९, गैर सैनिक ३ र आयोजनाका प्रबन्ध निर्देशकसहितको संयुक्त उद्धार टोलीले आयोजनाको कार्यालय र निवास पहिचान गरी उक्त इलाकासम्म पुग्न एक्स्काभेटरबाट बाटो बनाउने काम भइरहेको पनि सेनाले जनाएको छ।