बीपी राजमार्गमा सवारी चाप बढ्यो, मालवाहक गाडी रातिमात्र सञ्चालन गरिने

काभ्रेपलाञ्चोक । केही दिनअघि आएको बाढीले पृथ्वी राजमार्गको कृष्णभीरमा सडक अवरुद्ध भएपछि बीपी राजमार्गमा सवारी चाप बढेको छ। सवारी चाप बढेपछि जिल्ला प्रशासन कार्यालय काभ्रेपलाञ्चोकले ट्राफिक व्यवस्थापनका लागि आलोपालो प्रणाली लागू गरेको छ।

Watch On

जिल्लास्थित सुरक्षा समितिको बैठकले मालवाहक सवारीसाधनलाई तौल सीमा तोकेर रातिको समयमा मात्रै सञ्चालन गर्न दिने निर्णय गरेको छ। बीपी राजमार्गमा १० टनभन्दा बढी तौलका सवारीसाधन सञ्चालन गर्न समस्या हुने भएकाले तौल सीमा तोकिएको हो।

प्रमुख जिल्ला अधिकारी गोपालकुमार अधिकारीका अनुसार सडक जाम हुन नदिन ट्राफिक प्रहरी तथा जिल्ला प्रशासन कार्यालय सिन्धुलीसँग समन्वय गरी आवश्यक व्यवस्था मिलाइएको छ।

धुलिखेलबाट खुर्कोटतर्फ जाने र खुर्कोटबाट धुलिखेलतर्फ आउने मालवाहक सवारीसाधन सम्भव भएसम्म बाटोमै एकअर्कासँग क्रस नहुने गरी समय व्यवस्थापन गरिएको अधिकारीले बताए।

डिभिजन सडक कार्यालय भक्तपुरले दुर्घटनाको उच्च जोखिम रहेका साँघुरा घुम्ती तथा सडक अवरुद्ध हुनसक्ने स्थान पहिचान गरी तत्काल सुधारका काम अघि बढाउने भएको छ।

ग्यास बुलेटलगायत ठूला मालवाहक सवारीसाधनलाई बीपी राजमार्गको धुलिखेल–भकुण्डे सडकखण्डमा सुरक्षाकर्मीको उपस्थितिमा मात्रै सञ्चालन गरिने भएको छ।

डिभिजन सडक कार्यालयका प्रमुख सिनियर डिभिजनल इन्जिनियर सुमन योगेशले राजमार्गका जोखिमयुक्त स्थानमा सवारीसाधन सहज रूपमा पास गराउन तथा सडक अवरुद्ध हुन नदिन डोजर तथा अन्य उपकरण तयारी अवस्थामा राखिएको बताए।

'राजमार्गका जोखिमयुक्त स्थानमा सवारीसाधन सहज पास गराउन तथा सडक अवरुद्ध हुन नदिन डोजर तथा अन्य उपकरण तम्तयारी अवस्थामा राखिएको छ,'उनले भने।