भोटेकोशी बाढी : मृतकको संख्या १ हजार २५९ पुग्यो, ५ हजारभन्दा बढी सम्पर्कविहीन

काठमाडौँ । भोटेकोशी–त्रिशूली–नारायणी बाढीमा परी ज्यान गुमाउनेको संख्या १ हजार २५९ पुगेको छ। बिहीबार साँझ ७ बजेसम्मको विवरणअनुसार रसुवा, नुवाकोट, धादिङ, गोरखा, तनहुँ, नवलपरासी पूर्व, नवलपरासी पश्चिम र चितवनमा गरी १ हजार २५९ जनाको शव फेला परेको हो।

Watch On

फेला परेका शवमध्ये रसुवामा १२७, नुवाकोटमा १७३, धादिङमा ६०, गोरखामा ७२, तनहुँमा ३८, नवलपरासी पूर्वमा २१८, नवलपरासी पश्चिममा २१२ र चितवनमा ३५५ जना छन्।

हालसम्म ९५ जनाको सनाखत भइसकेको छ। सनाखत भएका शव आफन्तलाई बुझाइएको छ।

बाढीपछि करिब ५ हजार ८३ जना अझै सम्पर्कविहीन रहेको विवरण छ। रसुवा जिल्ला प्रशासन कार्यालयबाट प्राप्त विवरणअनुसार करिब २ हजार १३० जना, नुवाकोटबाट करिब २ हजार ३४० जना र ५८३ जना विदेशी नागरिक सम्पर्कविहीन छन्।

बाढी प्रभावित क्षेत्रमा हालसम्म १२ हजार ३८ जनाको उद्धार गरिएको छ। नेपाली सेनाले ४ हजार १२६, नेपाल प्रहरीले ३ हजार ९८८ र सशस्त्र प्रहरी बलले ३ हजार ९२४ जनाको उद्धार गरेको छ।

उद्धार तथा राहतका लागि नेपाली सेना, नेपाल प्रहरी र सशस्त्र प्रहरी बलका गरी २१ हजार ४०२ सुरक्षाकर्मी परिचालन गरिएको छ। नेपाली सेनाका ९ हजार २८७, नेपाल प्रहरीका ७ हजार ९१२ र सशस्त्र प्रहरी बलका ४ हजार २०३ जना सुरक्षाकर्मी परिचालन भएका छन्।

बाढीमा घाइते भएका ५ हजार ३८४ जनाको उपचार गरिएको छ। उद्धार गरिएका तथा प्रभावितमध्ये ३ हजार ८४४ जना विभिन्न होल्डिङ सेन्टरमा रहेका छन्। तीमध्ये नुवाकोटमा २ हजार ९८१, धादिङमा २६० र रसुवामा ६०३ जना छन्।

सरकारले प्रभावित जिल्लाका लागि नगद राहतसमेत उपलब्ध गराएको छ। रसुवा र नुवाकोटलाई १–१ करोड तथा धादिङलाई ५० लाख रुपैयाँ उपलब्ध गराइएको छ। त्यस्तै, प्रभावित १५ स्थानीय तहलाई १३ करोड ५० लाख रुपैयाँ राहत रकम उपलब्ध गराइएको छ।