समाज

उद्धारकर्मी भन्छन्- त्रिशूली–३ ‘ए’को सुरुङभित्र मानिसको आवाज सुनियो

सिधाकुरा

शुक्रबार, भदौ १९, २०८३

उद्धारकर्मी भन्छन्- त्रिशूली–३ ‘ए’को सुरुङभित्र मानिसको आवाज सुनियो

काठमाडौँ । माथिल्लो त्रिशूली–३ ‘ए’ जलविद्युत् आयोजनाको सुरुङभित्रबाट मानिस बोलेको आवाज सुनिएको जानकारी उद्धारमा खटिएको नेपाली सेनाको टोलीले दिएको सांसद श्रीराम न्यौपानेले बताएका छन्।

Watch On

न्यौपानेका अनुसार नेपाली सेना र सशस्त्र प्रहरीको उद्धार टोली सुरुङभित्र प्रवेश गरेर खोजी तथा उद्धार कार्यलाई तीव्रता दिइरहेको छ। सुरुङभित्रबाट मानिस बोलेको आवाज सुनिनु उद्धारका लागि आशाजनक संकेत भएको उनले सामाजिक सञ्जालमार्फत बताएका छन्।

'भित्रबाट मानिसको आवाज आएको जानकारी उद्धाररत सेनाबाट प्राप्त भएको छ,' न्यौपानेले लेखेका छन्, 'नेपाली सेना र सशस्त्र प्रहरीको उद्धार टोली सुरुङभित्र प्रवेश गरी उद्धार कार्यलाई तीव्रता दिइरहेको छ।'

न्यौपाने हिजो साँझसम्म इन्जिनियरको भूमिकामा आयोजनास्थलमै रहेर खोजी तथा उद्धार कार्यमा संलग्न थिए। अहिले सांसदको हैसियतमा हेलिकप्टर प्रयोग नगरी पैदल जनसंवाद गर्दै विदुर पुग्ने र त्यहाँबाट गाडीमार्फत काठमाडौँ फर्कने तयारीमा रहेको उनले बताएका छन्।

उनले उद्धारमा खटिएका नेपाली सेना, सशस्त्र प्रहरी, प्राविधिक टोली तथा अन्य उद्धारकर्मीप्रति सम्मान व्यक्त गर्दै सुरुङभित्र रहेका व्यक्तिको सकुशल उद्धारको खबर छिट्टै सुन्न पाइने आशा व्यक्त गरेका छन्।

प्रकाशित मिति: शुक्रबार, भदौ १९, २०८३

प्रतिक्रिया दिनुहोस्