प्रधानमन्त्री दैवी प्रकोप उद्धार कोषमा राहत बुझाउने बढ्दै

काठमाडौँ । भोटेकोशी बाढीपीडितको राहत, उद्धार तथा पुनःस्थापनाका लागि प्रधानमन्त्री दैवी प्रकोप उद्धार कोषमा सहयोग रकम दाखिला गर्ने क्रम बढ्दै गएको छ।

Watch On

बाढीबाट ठूलो जनधनको क्षति भएपछि विभिन्न स्थानीय तह, सरकारी तथा गैरसरकारी संस्था, निजी क्षेत्र र विद्यालयले कोषमा रकम जम्मा गर्न थालेका हुन्।

गुल्मीका १० स्थानीय तहले रु एक करोड ४७ लाख ४३ हजार ४३ सहयोग गर्ने निर्णय गरेका छन्। प्रभावित नागरिकप्रति ऐक्यबद्धता जनाउँदै स्थानीय तहले आफ्ना विपद् कोष तथा जनप्रतिनिधि, कर्मचारी र शिक्षकको पारिश्रमिकबाट रकम जुटाएर सहयोग गर्ने निर्णय गरेका हुन्।

सत्यवती गाउँपालिकाले रु ३० लाख ६८ हजार ३९१, इस्मा गाउँपालिकाले रु २१ लाख एक हजार ६९६, रुरु क्षेत्र गाउँपालिकाले रु २६ लाख ७५ हजार र कालीगण्डकी गाउँपालिकाले रु १९ लाख ५५ हजार १५६ सहयोग गर्ने भएका छन्।

त्यस्तै, चन्द्रकोट गाउँपालिकाले रु १४ लाख, धुर्कोट गाउँपालिकाले रु १३ लाख ३७ हजार, रेसुङ्गा नगरपालिकाले रु १० लाख, गुल्मी दरबार गाउँपालिकाले रु पाँच लाख, मदाने गाउँपालिकाले रु चार लाख पाँच हजार ८०० र मालिका गाउँपालिकाले रु तीन लाख सहयोग गर्ने निर्णय गरेका छन्।

सुनसरीको धरानस्थित बिपी कोइराला स्वास्थ्य विज्ञान प्रतिष्ठानले रु ३७ लाख दुई हजार सहयोग गरेको छ। प्रतिष्ठानका पदाधिकारी, शिक्षक, चिकित्सक, कर्मचारी, विद्यार्थी तथा पूर्वकर्मचारी (पेन्सनर) ले एक दिन बराबरको पारिश्रमिक, भत्ता तथा पेन्सन सहयोगस्वरूप उपलब्ध गराएको प्रतिष्ठानका प्रमुख मोहनकुमार राईले जानकारी दिए।

विराटनगरस्थित विराट ग्रुपले रु ७२ लाख कोषमा दाखिला गरेको छ। रसुवाको भोटेकोशीमा आएको विनाशकारी बाढीबाट प्रभावित नागरिकको राहत तथा उद्धारमा सहयोग पुर्‍याउने उद्देश्यले उक्त रकम दाखिला गरिएको ग्रुपका अध्यक्ष प्रा डा ज्ञानेन्द्र मानसिंह कार्कीले जानकारी दिए।

ग्रुपमा कार्यरत सम्पूर्ण कर्मचारीको एक दिनको तलब सङ्कलन गरी उक्त रकम जम्मा गरिएको हो।

यसैगरी, भक्तपुरका दुई विद्यालयले रु नौ लाख पाँच हजार ३०४ राहत रकम कोषमा दाखिला गरेका छन्। एभरेस्ट इङ्लिस स्कुलले रु छ लाख २३ हजार ४४ र एभरेस्ट भक्तपुर स्कुलले रु दुई लाख ८२ हजार २६० सहयोग गरेका हुन्।

रसुवाको बाढीबाट प्रभावित नागरिकको राहतका लागि सङ्कलन गरिएको उक्त रकम आज प्रधानमन्त्री दैवी प्रकोप उद्धार कोषमा दाखिला गरिएको विद्यालयका प्रधानाध्यापकहरूले जानकारी दिएका छन्।