चितवनमा फेला परेका ३६२ शवमध्ये ३३३ को व्यवस्थापन, ६८ आफन्तको डिएनए नमूना संकलन

नारायणगढ (चितवन) । रसुवाको भोटेकोशीमा आएको बाढीपछि त्रिशूली र नारायणी नदी किनारबाट चितवनमा फेला परेका शवको व्यवस्थापन, डिएनए नमूना संकलन तथा पहिचान गर्ने काम भइरहेको छ।

Watch On

जिल्ला प्रहरी कार्यालयका प्रहरी नायब उपरीक्षक चन्द्रभूषण यादवका अनुसार हालसम्म चितवनमा ३६२ शव फेला परेका छन्। तीमध्ये ३३३ शवको व्यवस्थापन गरिएको छ भने १४ शवको सनाखत भएपछि आफन्तको जिम्मा लगाइएको छ।

शवको वैज्ञानिक पहिचानका लागि भदौ १६ गतेदेखि डिएनए नमूना संकलन सुरु गरिएको हो। यादवका अनुसार भदौ २० गतेसम्म हराइरहेका व्यक्तिका ६८ जना आफन्तको डिएनए नमूना संकलन गरिएको छ।

भदौ १६ गते सात पुरुषको नमूना संकलन गरिएको थियो। भदौ १७ गते २६ जनाको नमूना संकलन गरिएकामा दुई महिला, २२ पुरुष र दुई भारतीय पुरुष नागरिक थिए।

यस्तै, भदौ १८ गते २२ जनाको नमूना संकलन गरिएकामा चार महिला, १४ पुरुष, एक बालक र तीन भारतीय पुरुष नागरिक थिए। भदौ १९ गते सात जनाको नमूना संकलन गरिएकामा एक महिला, चार पुरुष, एक बालक र एक भारतीय पुरुष नागरिक थिए।

भदौ २० गते छ जनाको नमूना संकलन गरिएकामा दुई महिला, एक पुरुष र तीन बालक छन्।

प्रहरी नायब उपरीक्षक यादवका अनुसार खोजी कार्य, शव पहिचानका लागि आफन्तको डिएनए परीक्षण, हराइरहेका व्यक्तिको विवरण संकलन तथा अन्य समन्वयात्मक काम निरन्तर भइरहेको छ।