कांग्रेसले फेरि सार्‍यो वडा अधिवेशन, महाधिवेशन के हुन्छ ?

काठमाडौँ । नेपाली कांग्रेसले १५औँ महाधिवेशनअन्तर्गत हुने वडा अधिवेशनको तालिका फेरि संशोधन गरेको छ ।

Watch On

आज बसेको केन्द्रीय कार्यसम्पादन समितिको बैठकले भदौ २४ मा हुने भनिएको वडा अधिवेशन असोजको पहिलो साता गर्ने निर्णय गरेको हो ।

मुलुकको पछिल्लो विषम परिस्थिति र बाढीपहिरोले प्रभावित जिल्लाको अवस्थालाई ध्यानमा राख्दै वडा अधिवेशनको मिति एक साता सार्ने निर्णय भएको प्रवक्ता देवराज चालिसेले जानकारी दिए । अधिवेशनको तय गर्ने जिम्मेवारी भने निर्वाचन समितिलाई दिइएको छ ।

यसअघि भदौ २ मा गर्ने भनिएको वडा अधिवेशनको तालिका केन्द्रीय समितिले संशोधन गर्दै भदौ २४ मा गर्ने निर्णय गरेको थियो । अब असोज ३ वा ४ गते वडा अधिवेशन हुने जनाइएको छ । बैठकले 
असोज १६ देखि १९ गतेसम्मका लागि तय गरिएको १५औँ महाधिवेशनको मिति भने नसार्ने निर्णय गरेको छ ।

यद्यपि, असन्तुष्ट पक्षलाई समेट्न महाधिवेशनको मिति पनि परिवर्तन हुनसक्ने कांग्रेसका नेताहरुले बताएका छन् ।

आजकै बैठकले क्रियाशील सदस्यका हकमा पनि लचकता अपनाउने निर्णय गरेको छ । २०८२ पुस २१ गतेसम्म तत्कालीन महामन्त्री (हाल सभापति) गगन थापाको नेतृत्वमा रहेको समितिले टुंग्याएको क्रियाशील सदस्यता नवीकरणलाई आधार मानेर अधिवेशनमा जाने निर्णय गरिएको एक नेताले जानकारी दिए ।

यो निर्णयअनुसार, महाधिवेशनमा सहभागी हुनकै लागि क्रियाशील सदस्यहरुले सदस्यता अद्यावधिक गर्नुपर्ने छैन । महाधिवेशन सम्पन्न नभएसम्म क्रियाशील सदस्यता अद्यावधिक गर्ने प्रक्रिया भने जारी रहने छ ।