रसुवा र नुवाकोटमा सय युनिटसम्म निशुल्क बिजुली दिने सरकारको तयारी

काठमाडौँ । सरकारले भोटेकोशी बाढीबाट प्रभावित रसुवा र नुवाकोटमा सय युनिटसम्म निशुल्क विद्युत् उपलब्ध गराउने तयारी गरेको छ । 

Watch On

ऊर्जा, जलस्रोत तथा सिँचाइ मन्त्रालयले बाढी प्रभावित क्षेत्रमा एक सय युनिटसम्म विद्युत महशुल छुट गर्ने तयारी गरेको हो । 

ऊर्जामन्त्री विराजभक्त श्रेष्ठले बाढी प्रभावित क्षेत्रमा विद्युत् महसुल छुट दिनेगरी गृहकार्य गर्न नेपाल विद्युत् प्राधिकरणलाई निर्देशन दिएका छन् । 

मन्त्रीको सचिवालयकाअनुसार प्रभावित क्षेत्रका नागरिकलाई राहत हुनेगरी विद्युत् महसुलमा कति छुट दिन सकिन्छ, कति समयलाई छुट दिन सकिन्छ भनेर गृहकार्य गरी मोडालिटी सञ्चालक समिति बैठकमा पेस गर्न मन्त्री श्रेष्ठले निर्देशन दिएका हुन् । 

अबको प्राधिकरणको सञ्चालक समिति बैठकले बाढी प्रभावित जिल्लाका नागरिकलाई राहत हुनेगरी विद्युत् महसुस छुट दिनेछ । 

प्राधिकरणमा भदौ महिनाको महसुस पूर्ण छुट दिने र असोज महिनाका लागि सय युनिटसम्म निशुल्क उपलब्ध गराउने गरी छलफल चलिरहेको छ । 

यसअघि जिल्ला प्रशासन कार्यालय रसुवाले सय युनिट विद्युत् महसुल छुट गर्न माग गरेको थियो । रसुवा विपद् संकटग्रस्त क्षेत्र घोषणा भएको अवस्थामा जिल्लामा खाना पकाउने एलपी ग्यासको आपूर्तिमा समस्या देखिएकाले उक्त क्षेत्रका बासिन्दाले विद्युतीय चुलोको प्रयोग गर्नुपर्ने बाध्यात्मक अवस्था रहेको भन्दै जिप्रकाले उक्त प्रभावित क्षेत्रको विद्युतको खपतलाई मध्यनजर गरी प्रति परिवार १०० (एक सय) युनिटसम्म विद्युत महशुल छुट गर्न गृह मन्त्रालयमार्फत उर्जा मन्त्रालयमा अनुरोध गरेका थियो ।