चक्रवातको प्रभावले असोज ८ देखि नेपालमा भारी वर्षाको सम्भावना

काठमाडौँ । उष्णकटिबन्धीय चक्रवातको सम्भावित प्रभावका कारण आगामी असोज ८ देखि १२ गतेसम्म नेपालका केही क्षेत्रमा भारीदेखि अति भारी वर्षा हुनसक्ने पूर्वानुमान गरिएको छ।

Watch On

मौसमविद् बिनोद पोखरेलले सामाजिक सञ्जालमार्फत चारवटा मौसम पूर्वानुमान मोडलले असोज ८ देखि १२ गतेसम्म नेपालका केही क्षेत्रमा भारीदेखि अति भारी वर्षाको संकेत गरेको जानकारी दिएका छन्।

उनका अनुसार चक्रवात घुमीफिरी नेपालतर्फ आउने सम्भावना देखिएको छ। यद्यपि अहिले नै यसको मार्ग र प्रभावबारे निश्चित निष्कर्ष निकाल्न सकिने अवस्था नरहेको उनले बताएका छन्।

‘अझै पूर्वानुमान निश्चित भइसकेको छैन, तर अहिलेदेखि नै सतर्कता अपनाउनु उचित देखिन्छ,’ पोखरेलले भनेका छन्।

उनले  युरोपेली मध्यम-श्रेणी मौसम पूर्वानुमान केन्द्रको ६–६ घण्टाको वर्षा तथा समुद्री सतहको वायुदाब (एसएलपी) सम्बन्धी पूर्वानुमानसहित तीनवटा अन्य मोडलको कुल वर्षा पूर्वानुमान सार्वजनिक गरेका छन्।

अन्तर्राष्ट्रिय पूर्वानुमान मोडलहरूमा आगामी सेप्टेम्बर २४ देखि २८ सम्म नेपालमा चक्रवातको प्रभावबाट भारी वर्षा हुनसक्ने संकेत देखिएको उल्लेख गरिएको छ।

तर चक्रवातको वास्तविक दिशा, तीव्रता र नेपालमा पर्ने प्रभावबारे थप पूर्वानुमानपछि मात्रै स्पष्ट हुने भएकाले अहिलेको अवस्थालाई सम्भावित जोखिमको प्रारम्भिक संकेतका रूपमा लिनुपर्ने देखिन्छ।