ग्यास अभावले सरकार असफल भएको संकेत गर्‍यो- एमाले प्रचार विभाग प्रमुख

काठमाडौँ । नेकपा (एमाले)ले नेपालीका सांस्कृतिक चाडपर्व नजिकिँदै गर्दा दैनिक उपभोग्य वस्तुको मूल्यवृद्धि भइरहेको र ग्यासको सहज आपूर्ति तथा व्यवस्थापन गर्न सरकार असफल भएको आरोप लगाएको छ।

Watch On

एमालेको प्रचार तथा प्रकाशन विभागका प्रमुख निरज आचार्यले बुधबार विज्ञप्ति जारी गर्दै आपूर्ति व्यवस्थापन र कालोबजारी नियन्त्रणमा सरकार असफल भएको दाबी गरेका हुन्।

उनले जनतालाई राहत दिन नसकेको सरकारले आफ्नो कमजोरी ढाकछोप गर्न विषयान्तरको खेलमा लागेको आरोप लगाए।

आचार्यका अनुसार ग्यासको सहज आपूर्ति गर्न नसकेर जनतालाई सास्ती दिइरहेको सरकारले मंगलबार सामाजिक सञ्जालमा ललितपुरका एक पौडेल थरका व्यापारीलाई एमाले केन्द्रीय सदस्यका रूपमा प्रस्तुत गर्दै ग्यास लुकाएको आरोप लगाएको भन्दै आपत्ति जनाएको छ।

उनले सरकार संरक्षित राजनीतिक दलका कार्यकर्ताले सामाजिक सञ्जालको दुरुपयोग गर्दै भ्रम फैलाउने, साइबर बुलिङ गर्ने र सामाजिक सद्भाव भड्काउने गतिविधि गरेको आरोपसमेत लगाए।

“सरकारको असफलता र जनताको समस्याबाट ध्यान मोड्न गरिएका यस्ता कुप्रचारको हामी कडा भर्त्सना गर्दछौँ,” आचार्यले विज्ञप्तिमा भनेका छन्।

सामाजिक सञ्जालमा फैलाइएका भ्रामक सामग्री, गतिविधि र त्यसमा संलग्नहरूको विवरण प्रमाणसहित सार्वजनिक गर्दै जाने उनले बताएका छन्।

“अब भ्रम, झुट र दुष्प्रचारको राजनीति धेरै दिन चल्ने छैन। हामी डिजिटल निगरानीमा छौँ,” विज्ञप्तिमा भनिएको छ।

एमालेले जनतालाई भ्रमित पार्नेभन्दा आफ्ना कमजोरीको जवाफ दिन सरकारलाई आग्रह गरेको छ।