'डिजिटल पार्लियामेन्ट' शुरुवात हुँदै

काठमाडौँ । संघीय संसदलाई 'डिजिटल पार्लियामेन्ट'मा रुपान्तरण गर्न लागिएको छ । 

Watch On

संघीय संसद सचिवालयले आजदेखि डिजिटल पार्लियामेन्ट प्लेटफर्म परीक्षण गरेर प्रविधिमैत्री संसदको अवधारणालाई कार्यान्वयनमा ल्याउन लागेको हो । 

डिजिटल पार्लियामेन्ट प्लेटफर्म परीक्षण सञ्चालन उद्घाटन  सार्वजनिक लेखा समिति सभाकक्षमा विहान १० बजे सभामुख डोलप्रसाद अर्याल र राष्ट्रिय सभा अध्यक्ष नारायण दाहालले गर्दैछन् । 

मंगलबार बसेको प्रतिनिधि सभा कार्यव्यवस्था परामर्श समितिको बैठकमा प्रतिनिधि सभा तथा सचिवालयका कामकारबाहीलाई प्रविधिमैत्री बनाउँदै ‘डिजिटल पार्लियामेन्ट’को अवधारणाअनुरूप विकास गर्ने सम्बन्धमा हालसम्म भएका कार्यप्रगति र आगामी योजनाबारे सचिवालयले समितिका सदस्यहरूलाई जानकारी गराएको थियो ।

डिजिटल पार्लियामेन्टको अवधारणाअनुसार प्रतिनिधि सभा तथा सचिवालयका कामकारबाहीलाई क्रमशः डिजिटल प्रणालीमा रूपान्तरण गर्ने उद्देश्यले परीक्षणको शुभारम्भ गरिने जानकारी बैठकमा दिइएको थियो ।

सो सम्बन्धमा समितिका सदस्यहरूले विभिन्न राय, सुझाव तथा परामर्श दिएका थिए । बैठकमा प्राप्त सुझावलाई समेट्दै डिजिटल पार्लियामेन्टको कार्यान्वयनलाई प्रभावकारी बनाउने विषयमा छलफल भएको थियो ।

संसद सचिवालयका प्रवक्ता एकराम गिरीकाअनुसार अब संसदका सबै गतिविधि अनलाइनमार्फत हुनेछन् । सांसदहरुले मोबाइलबाटै संसदीय गतिविधिमा भाग लिन पाउनेछन् । अब सांसदहरुको विद्युतीय हाजिरी हुनेछ ।