समाज

बाढी प्रभावित नुवाकोट र रसुवामा सिएमसीको २१ सदस्यीय चिकित्सक टोली

सिधाकुरा

बुधबार, भदौ ३१, २०८३

बाढी प्रभावित नुवाकोट र रसुवामा सिएमसीको २१ सदस्यीय चिकित्सक टोली

चितवन । चितवन मेडिकल कलेज (सिएमसी) शिक्षण अस्पतालले बाढी प्रभावित नुवाकोट र रसुवामा विशेषज्ञ चिकित्सकसहित २१ सदस्यीय स्वास्थ्य टोली पठाएको छ।

Watch On

अस्पतालले आज पठाएको टोलीले असोज ५ गतेसम्म बाढी प्रभावित क्षेत्रका विभिन्न स्थानमा पुगेर निःशुल्क स्वास्थ्य उपचार सेवा दिनेछ।

टोलीको नेतृत्व गरेका डा. वीरेन्द्र राउतका अनुसार टोलीमा मुटुरोग, जनरल मेडिसिन, हाडजोर्नी तथा मनोरोगलगायतका विशेषज्ञ चिकित्सक छन्।

टोलीले भिडियो एक्सरे, युरिनरी आर/ई, पीएफटी, ल्याब परीक्षणलगायत स्वास्थ्य सेवा प्रदान गर्नेछ। परीक्षणका क्रममा आवश्यक पर्ने औषधिसमेत बिरामीलाई निःशुल्क उपलब्ध गराइने अस्पतालले जनाएको छ।

अस्पतालका प्रमुख प्रशासकीय अधिकृत प्रताप देवकोटाले आवश्यक देखिए थप चिकित्सक टोली पठाइने बताए। अहिले गएको टोलीले पाँच दिन सेवा दिने र बाढी प्रभावित क्षेत्रको अवस्था हेरेर अर्को टोली पठाउने वा यही टोलीलाई थप समयसम्म परिचालन गर्ने निर्णय गरिने उनले बताए।

“बाढीपछि हुनसक्ने स्वास्थ्य समस्यालाई मध्यनजर गर्दै हामीले स्वास्थ्य टोली पठाएका हौँ,” देवकोटाले भने।

उनका अनुसार सरकारी निकायसँग समन्वय गरेर आवश्यक देखिएका स्थानमा स्वास्थ्य सेवा प्रदान गरिनेछ।

प्रकाशित मिति: बुधबार, भदौ ३१, २०८३

प्रतिक्रिया दिनुहोस्