सरकारले भन्यो– विभिन्न देशमा रिक्त रहेका राजदूत नियुक्तिको प्रक्रिया चाँडै टुंग्याउँछौं

काठमाडौं। सरकारले संकटका बेला विदेशी कूटनीतिक समन्वयलाई प्रभावकारी बनाउन विभिन्न देशमा रिक्त रहेका राजदूत नियुक्तिको प्रक्रिया चाँडै टुंग्याउने भएको छ।

Watch On

सिंहदरबारमा बुधबार बसेको मन्त्रिपरिषद् बैठकपछि सरकारका प्रवक्ता एवं शिक्षामन्त्री सस्मित पोखरेलले रिक्त रहेका राजदूतको नियुक्ति प्रक्रिया परराष्ट्र मन्त्रालयमार्फत चाँडै टुंग्याइने बताएका हुन्।

बैठकले सरकारी निर्णय प्रक्रिया सरलीकरण तथा डिजिटल बनाउने सम्बन्धी नियमावली, २०८३ स्वीकृत गरेको छ। यससँगै सरकारी निर्णय प्रक्रियालाई थप सरल र डिजिटल बनाउने व्यवस्था अघि बढ्ने भएको छ।

त्यस्तै, बैठकले सेयर कारोबारमा हुने लाभमा अग्रिम करको दरसम्बन्धी निर्णय गरेको छ। सूचीकृत निकायका धितोपत्र विनिमयमार्फत हित बिक्रीबाट प्राप्त लाभ रकममा ३६५ दिनभन्दा बढी अवधि स्वामित्वमा रहेको हितका लागि ३.५ प्रतिशत र ३६५ दिन वा सोभन्दा कम अवधि स्वामित्वमा रहेको हितका लागि ५ प्रतिशत अग्रिम कर कायम गर्ने निर्णय भएको प्रवक्ता पोखरेलले बताए।

मन्त्रिपरिषद्ले नेपाल न्याय सेवा, न्याय समूह, राजपत्राङ्कित प्रथम श्रेणीका अधिकृतहरू ठगेन्द्र कट्टेल, रामप्रसाद भट्टराई र बाबुराम दाहाललाई राजपत्राङ्कित विशिष्ट श्रेणीमा बढुवा गर्ने निर्णय पनि गरेको छ।

त्यसैगरी, नेपाल प्रशासन सेवा, राजपत्राङ्कित प्रथम श्रेणीका सहसचिव कालीप्रसाद पराजुलीलाई सचिव (विशिष्ट श्रेणी) पदमा बढुवा गर्ने निर्णय भएको छ।

साउदी अरेबियामा मृत्यु वा घाइते भएका नेपाली नागरिकको बीमा तथा क्षतिपूर्ति प्राप्त गर्ने कानुनी प्रक्रियाका लागि त्यहाँका कानुनी व्यवसायीलाई वारेसनामा दिने व्यवस्था गर्न आदेश जारी गर्ने निर्णयसमेत बैठकले गरेको छ।

सरकारले सक्रिय राहत कोष सञ्चालन कार्यविधि, २०८३ पनि स्वीकृत गरेको छ।

प्रवक्ता पोखरेलका अनुसार बाढीपीडितलाई होल्डिङ सेन्टरबाट अस्थायी आवासमा सार्ने काम भइरहेको छ। घरजग्गा पूर्ण रूपमा गुमाएका परिवारलाई अन्यत्र स्थानान्तरण गर्न भूमि मन्त्रालयले उपयुक्त जग्गा खोजीको काम अघि बढाएको उनले बताए।

उनका अनुसार प्राकृतिक विपद्का कारण विस्थापित भएका नागरिकको व्यवस्थापन र राहतका लागि सरकारले आवश्यक प्रक्रिया अघि बढाइरहेको छ।

प्रवक्ता पोखरेलले संकटका बेला अन्तर्राष्ट्रिय तथा विदेशी कूटनीतिक समन्वयलाई प्रभावकारी बनाउन विभिन्न देशमा रिक्त रहेका राजदूतको नियुक्ति प्रक्रिया परराष्ट्र मन्त्रालयमार्फत चाँडै टुंग्याइने बताए।