यी हुन् आज बाढी-पहिरोले अवरुद्ध सडकहरु

काठमाडौँ । अविरल वर्षासँगै आएको बाढी र पहिरोका कारण देशका प्रमुख राजमार्गहरू प्रभावित भएका छन् ।

Watch On

नेपाल प्रहरीको केन्द्रीय प्रहरी समाचार कक्षले आज विहान जारी गरेको पछिल्लो विवरणअनुसार बागमती, गण्डकी र कर्णाली प्रदेशका चारवटा मुख्य राजमार्ग खण्डहरू पूर्ण रूपमा ठप्प भएका छन् भने केही सडकमा एकतर्फी तथा समयसीमा तोकेर मात्र सवारी सञ्चालन गर्न दिइएको छ।

प्रहरीकाअनुसार चार प्रमुख सडक खण्ड पूर्ण अवरुद्ध छन् । बाढीका कारण रसुवाका सबै मुख्य राजमार्गहरू अर्को सूचना जारी नभएसम्मका लागि पूर्ण रूपमा बन्द छन्।

 विदुर नगरपालिका-१० सिमटारमा आएको बाढीका कारण नुवाकोट (पासाङ ल्हामु सडक खण्ड)  पूर्ण रूपमा अवरुद्ध भएको छ ।

नासो गाउँपालिका-३ खोत्रोमा खसेको पहिरोका कारण मनाङ (चामे-बेशिसहर सडक खण्ड)मा सवारी सञ्चालन हुनसकेको छैन ।

सर्केगाड गाउँपालिका-६ खरीखेतमा पहिरो जाँदा हुम्ला (कर्णाली करिडोर) सडक पूर्ण रूपमा बन्द छ।

दुई ठाउँमा एकतर्फी यातायात सञ्चाल भइरहेको छ । त्रियुगा नगरपालिका-०७ झोलुङ्गेपुलमा खसेको पहिरो हटाएपछि उदयपुर (मदन भण्डारी लोकमार्ग) बाटो एकतर्फी सुचारु गराइएको छ।

बेनीघाट रोराङ गाउँपालिका वडा नं. १० जोवाङखोला र शितलबजार क्षेत्रमा पहिरो पन्छाएर धादिङ (पृथ्वी लोकमार्ग) एकतर्फी रूपमा गाडी चलाउन दिइएको छ ।

काभ्रे र नुवाकोटमा सवारी सञ्चालनमा समयसीमा

जोखिम बढेसँगै केही सडक खण्डमा समय तोकेर मात्र गाडी चलाउन अनुमति दिइएको छ । बि.पि. राजमार्ग (काभ्रे)को खुर्कोट-नेपालथोक-कटुन्जेबेँसी खण्डमा १० टनसम्मका मालवाहक सवारी साधन साँझ ७:०० बजेदेखि बिहान ५:०० बजेसम्म मात्र सञ्चालन हुनेछन् । अन्य साना तथा यात्रुवाहक सवारी साधन बिहान ४:०० बजेदेखि साँझ ६:०० बजेसम्म परिस्थिति हेरेर मात्र सञ्चालन गर्न दिइनेछ ।

टोखा-छहरे सडक खण्ड (नुवाकोट)को शिवपुरी गाउँपालिका-८ घट्टेखोला क्षेत्रमा बाढी तथा पहिरोको जोखिम उच्च रहेकाले राति १०:०० बजेदेखि बिहान ५:०० बजेसम्म यात्रामा पूर्ण रोक लगाइएको छ।

प्रहरीले लगातारको वर्षाका कारण पहिरोको जोखिम यथावत् रहेकाले अत्यावश्यक कामबाहेक यात्रा नगर्न र यात्रामा निस्कनुअघि नजिकैको प्रहरी कार्यालय वा राजमार्ग सुरक्षा टोलीसँग सडकको अवस्थाबारे जानकारी लिन सर्वसाधारणमा अपिल गरेको छ । अवरुद्ध सडकहरू खोल्नका लागि प्राविधिक टोली र मेसिनरी उपकरणहरू परिचालन गरिएको छ ।