रसुवा बाढीमा मृत्यु हुनेको संख्या १ हजार ४१० पुग्यो, ६ हजार १४५ अझै बेपत्ता

काठमाडौं । भोटेकोशीको विनाशकारी बाढीमा मृत्यु हुनेको संख्या १ हजार ४१० पुगेको छ। अझै ६ हजार १४५ जना बेपत्ता रहेको राष्ट्रिय विपद जोखिम न्यूनीकरण तथा व्यवस्थापन प्राधिकरणले जनाएको छ।

Watch On

मृतकमध्ये ३३६ जना महिला, ५४९ जना पुरुष र ५२५ वटा मानव अवशेष रहेका छन्। बाढी तथा पहिरो प्रभावित क्षेत्रमा हालसम्म १३ हजार ७५६ जनाको उद्धार गरिएको छ।

उद्धार गरिएकामध्ये ३४४ जना उपचाररत छन् भने २९० जना उपचारपछि डिस्चार्ज भएका छन्। विभिन्न सुरक्षा निकायमार्फत ९ हजार ८२० जनालाई उपचार सेवा प्रदान गरिएको प्राधिकरणले बताएको छ।

मृतकको पहिचानका लागि हालसम्म १ हजार २८६ जना मृतक र उनीहरूका आफन्तका १ हजार ९४४ वटा डिएनए नमुना संकलन गरिएको छ।

२७ वटा होल्डिङ सेन्टर

बाढी प्रभावितबाट उद्धार गरिएकाहरूको व्यवस्थापनका लागि २७ वटा होल्डिङ सेन्टर स्थापना गरिएको छ। तीमध्ये नुवाकोटमा ८३२, रसुवामा ८१७ र धादिङमा ९४ जना रहेका छन्।

उद्धार तथा राहतका लागि नेपाल प्रहरी र नेपाली सेनाका हेलिकप्टरबाट १ हजार ६३४ तथा सशस्त्र प्रहरी बलबाट ३२० उडान भएका छन्।

नुवाकोटको देवीघाटमा एक्रो पुल जडान गरी सञ्चालनमा ल्याइएको छ। सडक तथा हवाई मार्गबाट प्रभावित क्षेत्रमा खाद्यान्न तथा गैरखाद्य राहत सामग्री वितरणलाई निरन्तरता दिइएको छ।

प्रभावित क्षेत्रमा इन्धन र ग्यास पठाइँदै

राहत तथा पुनःस्थापनाका लागि प्रभावित क्षेत्रमा डिजेल ६० हजार लिटर, पेट्रोल १२ हजार लिटर र हवाई इन्धन ४ हजार लिटर उपलब्ध रहेको रिपोर्टमा उल्लेख छ। प्रभावित क्षेत्रमा ५०२ वटा ग्यास सिलिन्डर पठाइएको छ।

होल्डिङ सेन्टरमा नबस्ने परिवारलाई मासिक भत्ता

होल्डिङ सेन्टरमा बस्न नचाहने परिवारलाई सरकारले अधिकतम ६ महिनासम्म आवास तथा जीविकोपार्जनका लागि मासिक नगद सहयोग दिने भएको छ।

परिवारलाई प्रतिमहिना १५ हजार रुपैयाँ दिइनेछ। चार जनाभन्दा बढी सदस्य भएको परिवारमा थप प्रत्येक सदस्यका लागि मासिक २ हजार रुपैयाँ उपलब्ध गराइनेछ।

डिएनए परीक्षणका लागि प्रहरी कार्यालयमा नमुना दिन सकिने

बेपत्ता तथा मृतकको पहिचानका लागि डिएनए परीक्षण गर्न सम्बन्धित जिल्ला प्रहरी कार्यालयमा नमुना बुझाउन सकिने व्यवस्था गरिएको छ।

यसका लागि दुईवटा फोटो र नाता प्रमाणित गर्ने कागजातसहित नमुना बुझाउन सकिने रिपोर्टमा उल्लेख छ।