राष्ट्रिय मुक्ति पार्टी नेपालका महासचिवसहित ९ नेता पार्टीबाट अलग

काठमाडौं । राजेन्द्र महतो नेतृत्वको राष्ट्रिय मुक्ति पार्टी नेपालका महासचिव केशवकुमार झासहित नौ जना पदाधिकारी तथा केन्द्रीय सदस्यले पार्टीबाट राजीनामा दिएका छन्।

Watch On

उनीहरूले २०८३ असोज २ गते पार्टीको साधारण सदस्यसमेत नरहने गरी राजीनामा दिएको घोषणा गरेका हुन्। राजीनामा दिनेमा महासचिव झासहित केन्द्रीय सदस्यहरू चन्द्रानन्द मिश्र, पंकजकुमार देव, हिरालाल मण्डल, अनुपम झा, रिषिका जलान, कुमारी तामाङ, ललन मिश्र र शैशव राजु छन्।

राजीनामा घोषणा गर्दै उनीहरूले अबको राजनीतिक यात्रा ‘हुंकार मधेश अभियान’मार्फत अघि बढाउने बताएका छन्।

उनीहरूले पछिल्ला राजनीतिक घटनाक्रमले पुरानो शैली र पुराना व्यक्तिबाट देशको राजनीति अघि बढ्ने अवस्था नरहेको दाबी गरेका छन्। देशका जनता निराश रहेको र विभिन्न संघर्ष तथा आन्दोलन भए पनि जनताका न्यूनतम आवश्यकता पूरा हुन नसकेको उनीहरूको भनाइ छ।

विज्ञप्तिमा उनीहरूले नेपालको मौलिक वैचारिकीका आधारमा बलियो अर्थतन्त्र निर्माण गर्न सहयोग पुग्ने अर्थ–राजनीतिको सहारा लिएर अघि बढ्नुपर्ने बताएका छन्। सामाजिक तथा सांस्कृतिक चेतना विकासका लागि अभियान, राजनीतिक चेतनाका लागि संघर्ष र आर्थिक चेतनाका लागि ‘विद्रोहको तयारी’ गर्ने उनीहरूको भनाइ छ।

‘जब सम्म औपनिवेशिकताको अन्त्य हुँदैन, तबसम्म लोकतन्त्रको प्रत्याभूति सम्भव छैन’ भन्दै उनीहरूले लोकतन्त्र र शान्तिबिना समृद्धि हासिल गर्न नसकिने बताएका छन्।

पार्टीबाट अलग हुने निर्णय लिँदै उनीहरूले अहिलेसम्म प्राप्त उपलब्धिका लागि योगदान गर्ने सबैलाई धन्यवादसमेत दिएका छन्। अबको यात्रा ‘विचारसहितको विकल्प र विकल्पसहितको विद्रोह’का लागि ‘हुंकार मधेश अभियान’सँग हुने उनीहरूले बताएका छन्।

उनीहरूले छिट्टै समाजका विभिन्न पक्षका सक्षम तथा योग्य व्यक्तित्वलाई एकताबद्ध गरेर विस्तृत योजनासहित सार्वजनिक हुने प्रतिबद्धता पनि जनाएका छन्।