कांग्रेसले भोलिदेखि नेता छान्ने, कुन पदमा उम्मेदवार बन्न कति पैसा ?

काठमाडौँ । नेपाली कांग्रेसको १५ औं महाधिवेशन प्रक्रिया भोलि (शनिबार) सुरु हुँदैछ । महाधिवेशन तालिकाअनुसार, भोलि र पर्सि (असोज ३ र ४ गते) देशभरका वडामा अधिवेशन अधिवेशन हुने छ ।

Watch On

वडा अधिवेशनबाट वडा कार्य समिति र क्षेत्रीय प्रतिनिधि चयन हुने छन् । क्षेत्रीय प्रतिनिधिहरूले महाधिवेशन प्रतिनिधि छान्ने छन् । महाधिवेशन प्रतिनिधिहरूले केन्द्रीय सभापति, पदाधिकारी र सदस्यहरू निर्वाचित गर्नेछन् ।

महाधिवेशन प्रक्रियाअन्तर्गत वडा, पालिका, प्रदेशसभा क्षेत्र, प्रतिनिधिसभा निर्वाचन क्षेत्र, जिल्ला समिति, प्रदेश समिति र केन्द्रीय समिति चयन गरिने छ । वडादेखि केन्द्रसम्मै नयाँ नेतृत्व छानिने छन् ।

केन्द्रीय निर्वाचन समितिले सबै तहमा छानिने नेतृत्वका लागि उम्मेदवारी शुल्क तोकेको छ । न्यूनतम् ५ सयदेखि अधिकतम् ४० हजार रुपैयाँसम्म उम्मेदवारी शुल्क तोकिएको छ । केन्द्रीय निर्वाचन समितिले जारी गरेको निर्वाचन निर्देशिकामा कुन तहको नेतृत्वको उम्मेदवार बन्दा कति शुल्क लाग्छ भनेर उल्लेख गरेको छ ।

पार्टीको केन्द्रीय सभापतिको उम्मेदवार बन्न ४० हजार रुपैयाँ शुल्क बुझाउनुपर्नेछ । सभापतिको उम्मेदवार बन्न महाधिवेशन प्रतिनिधिबाट १० जना प्रस्तावक र १० जना समर्थक चाहिन्छ । केन्द्रीय उपसभापति र महामन्त्रीका लागि ३० हजार, सहमहामन्त्रीका लागि २० हजार र केन्द्रीय सदस्यका लागि ११ हजार रुपैयाँ उम्मेदवारी शुल्क तोकिएको छ ।

प्रदेश सभापतिका लागि २० हजार, उपसभापति र महामन्त्रीका लागि १५ हजार, सहमहामन्त्रीका लागि १० हजार र प्रदेश सदस्यका लागि पाँच हजार उम्मेदवारी शुल्क तोकिएको छ ।

त्यसैगरी जिल्ला सभापतिको उम्मेदवार बन्न १५ हजार, उपसभापति र सचिवलाई ७ हजार, सहसचिवलाई ६ हजार र सदस्य बन्न ३ हजार उम्मेदवारी शुल्क तय गरिएको छ ।

त्यस्तै, प्रतिनिधिसभा क्षेत्रीय समितिको सभापतिलाई १० हजार, उपसभापति र सचिवलाई ५ हजार, सहसचिवलाई ४ हजार र सदस्यलाई २ हजार उम्मेदवारी शुल्क तोकिएको छ भने केन्द्रीय महाधिवेशन प्रतिनिधिलाई ७ हजार र महासमिति सदस्यलाई ५ हजार शुल्क तोकिएको छ ।

प्रदेशसभा क्षेत्रीय सभापति बन्न ७ हजार, उपसभापति र सचिव बन्न ४ हजार, सहसचिव बन्न ३ हजार सदस्य बन्न २ हजार उम्मेदवारी शुल्क बुझाउनुपर्छ भने प्रदेश अधिवेशन प्रतिनिधिका उम्मेदवारले ५ हजार शुल्क बुझाउनुपर्छ ।

महानगर र उपमहानगर सभापतिलाई ७ हजार, उपसभापति र सचिवलाई ४ हजार, सहसचिवलाई ३ हजार र सदस्यलाई २ हजार शुल्क तोकिएको छ भने नगरपालिका कार्य समिति सभापतिलाई ५ हजार, उपसभापति र सचिवलाई ३ हजार, सहसचिवलाई २ हजार र सदस्यलाई १ हजार शुल्क तोकिएको छ ।

त्यसैगरी गाउँपालिका कार्यसमिति सभापतिमा ५ हजार, उपसभापति र सचिवमा २ हजार, सहसचिवमा १५ सय र सदस्यलाई १ हजार उम्मेदवारी शुल्क तोकिएको छ ।

पार्टीको सबैभन्दा तल्लो निकाय वडा कार्यसमितिको सभापतिलाई १ हजार, उपसभापति, सचिव र सहसचिवलाई ७ सय, सदस्यलाई ५ सय तथा क्षेत्रीय प्रतिनिधिको उम्मेदवार बन्न ५ सय शुल्क तोकिएको छ ।

उम्मेदवारी शुल्क उम्मेदवारी दर्ता गराउने ठाउँमा नगदै वा बैंकमा र क्युआरमार्फत पनि बुझाउन सकिने निर्वाचन समितिले जनाएको छ ।