एमाले विभाजन र पार्टी एकताबारे फैलाइएका हल्ला भ्रमपूर्ण : महेश बस्नेत

काठमाडौं । नेकपा (एमाले) का सचिव महेश बस्नेतले पार्टी विभाजन, एमाले–नेकपा एकता तथा पार्टीको नेतृत्व र चुनाव चिह्न परिवर्तनबारे फैलाइएका हल्ला भ्रमपूर्ण भएको बताएका छन्।

Watch On

बस्नेतले सामाजिक सञ्जालमार्फत एमाले एकताबद्ध रहेको र अझ ऊर्जा तथा उत्साहका साथ अघि बढ्ने बताएका हुन्।

उनका अनुसार असोज ५, ६ र ७ गते एमाले केन्द्रीय कमिटीको बैठक बस्दैछ। त्यसअघि असोज ४ गते सचिवालय बैठक बसेर केन्द्रीय कमिटी बैठकका एजेन्डा तय गरिनेछ। असोज ३ गते निर्वाचन समीक्षा तथा पार्टी पुनर्गठन कार्यदलले आफ्नो प्रतिवेदनलाई एकरूपता दिने उनले बताएका छन्।

यही प्रक्रियालाई लिएर केही सञ्चारमाध्यम तथा सामाजिक सञ्जालमा ‘एमाले विभाजन हुँदैछ’, ‘एमाले–नेकपा मिल्दैछ’, ‘अध्यक्ष र महासचिव अमूक व्यक्ति हुँदैछन्’ तथा ‘सूर्य चिन्ह र एमाले नाम नै नरहन सक्छ’ जस्ता समाचार तथा हल्ला फैलाइएको बस्नेतको भनाइ छ।

एमालेलाई कमजोर बनाउने नियोजित योजनाअन्तर्गत यस्ता भ्रम फैलाइएको दाबी गर्दै उनले त्यसको पछि नलाग्न आग्रह गरेका छन्।

केन्द्रीय कमिटी बैठकपछि एमाले वर्तमान चुनौतीको सशक्त सामना गर्दै अझ मजबुत, एकताबद्ध र ऊर्जाशील भएर अघि बढ्ने बस्नेतले बताएका छन्।

उनले ‘अधिनायकवादी, निरंकुश र जनविरोधी’ भन्दै बालेन नेतृत्वको सरकारविरुद्ध लोकतान्त्रिक संघर्षलाई सशक्त बनाउने बताएका छन्। मुलुकको राजनीतिक कोर्सलाई सही दिशामा अघि बढाउने अभियानमा एमाले दृढताका साथ उभिने र नयाँ ऊर्जा तथा उत्साहका साथ जनताको बीचमा आउने उनको भनाइ छ।