प्रतिनिधि बन्न कांग्रेसका नेताहरू आ–आफ्नो वडामा

काठमाडौँ । नेपाली कांग्रेसको १५औं महाधिवेशन अन्तर्गत आज वडा अधिवेशन सुरु भएको छ । निर्वाचन समितिका अनुसार, आज देशका अधिकांश वडामा अधिवेशन सुरु भएको छ । वडा अधिवेशनका लागि आज र भोलि गरी दुई दिन तोकिएको छ ।

Watch On

वडा अधिवेशनमा वडाभित्रका क्रियाशील सदस्य प्रतिनिधि हुने छन् । अधिवेशनले वडा सभापति, एक महिलासहित दुई उपसभापति, एक सचिव, एक सहसचिव र सदस्य निर्वाचित गर्नेछ ।

त्यस्तै, वडा अधिवेशनबाटै क्रियाशील सदस्य संख्या र समावेशी सिद्धान्तका आधारमा क्षेत्रीय प्रतिनिधि चयन हुने छन् । क्षेत्रीय प्रतिनिधिहरुबाटै प्रदेश अधिवेशन र महाधिवेशन प्रतिनिधि चयन हुनेछन् ।

कांग्रेसले यसपालि स्वतः महाधिवेशन प्रतिनिधि हुने व्यवस्था हटाएको छ । केन्द्रीय समितिका सभापति, पदाधिकारी र सदस्यसहित सबै तहका नेताहरु तल्लो तहबाटै छानिँदै महाधिवेशन प्रतिनिधि चुनिनुपर्ने छ ।

स्वतः महाधिवेशन प्रतिनिधि बन्ने प्रावधान हटेपछि कांग्रेस सभापति गगनकुमार थापासहित सबै नेताहरु आ आफ्नो वडामा पुगेका छन् ।

सभापति गगनकुमार थापा काठमाडौं निर्वाचन क्षेत्र नम्बर ४ अन्तर्गत काठमाडौं महानगर ३० नम्बर वडाको अधिवेशनमा सहभागी भएका छन् र क्षेत्रीय प्रतिनिधिका लागि उम्मेदवारी दर्ता गराएका छन् । 

त्यसअघि सभापति थापाले आफ्नो क्रियाशील सदस्यता रहेको ३० नम्बर वडाको अधिवेशन उद्घाटन गरेका थिए ।

सो क्रममा सभापति थापाले पार्टीको महाधिवेशनमा सबैलाई समेट्न आफूले अधिकतम प्रयास गरेको बताए । पार्टीको विवाद समाधानका लागि अन्तिम क्षणसम्म प्रयास जारी रहने र त्यसका लागि सबै पक्षका शीर्ष नेताहरूसँग भेटघाट र छलफल गरिरहेको उनको भनाइ थियो ।

गत पुसमा सम्पन्न विशेष महाधिवेशनबाट निर्वाचित नेतृत्वले पन्ध्रौं महाधिवेशन प्रक्रिया सुरु गरे पनि निवर्तमान सभापति शेरबहादुर देउवासहितका केही नेता भने यो महाधिवेशन प्रक्रियामा सहभागी छैनन् । देउवा नेतृत्वको समूहले छुट्टै महाधिवेशन गर्ने गरी तालिका सार्वजनिक गरेको छ ।

त्यस्तै, अघिल्लो महाधिवेशनमा सभापतिको उम्मेदवार रहेका नेता डा. शेखर कोइराला पनि यो महाधिवेशनमा सहभागी छैनन् । कोइरालाले कुनै पनि समूहले आयोजना गर्ने महाधिवेशनमा सहभागी नहुने बताएका छन् ।

देउवा र शेखर महाधिवेशनमा सहभागी नभए पनि उनीहरु पक्षका अधिकांश नेता भने महाधिवेशनमा सहभागी भएका छन् । देउवा पक्षका ५१ जना नेता असोज १ गते सानेपा पुगेर केन्द्रीय समितिको बैठकमा सहभागी भएका थिए ।