समाज

बाढी प्रभावित रसुवाको उत्तरगया–१ मा जोडियो बिजुली

अब रसुवामा ८६ घरधुरी मात्रै बाँकी, नुवाकोट र धादिङमा पूर्ण विद्युत आपूर्ति

सिधाकुरा

शनिबार, असोज ३, २०८३

बाढी प्रभावित रसुवाको उत्तरगया–१ मा जोडियो बिजुली

काठमाडौँ । सरकारले बाढी प्रभावित क्षेत्रमा विद्युत् पुनःस्थापनालाई तीव्रता दिएको छ ।

Watch On

ऊर्जा, जलस्रोत तथा सिँचाइ मन्त्री विराज भक्त श्रेष्ठकाअनुसार शनिबार बाढी प्रभावित रसुवाको उत्तरगया–१ मा बिजुली जोडिएको छ ।

रसुवामा आज चिलिमे २२० केभी हबबाट ११ केभी सप्लाई पठाई बाटोमा ट्यापिङमार्फत उत्तरगया–१ तिरुगोमाने/धार्ना क्षेत्रमा विद्युत् आपूर्ति विस्तार गरिएको मन्त्री श्रेष्ठले बताए ।

उनकाअनुसार यससँगै रसुवाको लगभग सम्पूर्ण क्षेत्र विद्युतीकरणको अवस्थामा पुगेको छ । अब बाँकी ८६ घरधुरीमा बिजुली जोड्ने काम भइरहेको छ ।

बाँकी घरधुरीमध्ये गोसाइँकुण्ड–१ दाहालफेदीका ४६ र गोसाइँकुण्ड–३ लिङलिङका ४० घरधुरीमा सेवा पुर्‍याउने काम जारी रहेको मन्त्री श्रेष्ठले बताए ।

'भदौ १० गते भोटेकोशी नदीमा आएको विनाशकारी बाढीले विद्युत पूर्वाधार र संरचनामा ठूलो क्षति पुगेको चुनौतीपूर्ण अवस्थाबाट आज हामी सामान्य स्थितिमा आइपुगेका छौं । आज असोज ३ गतेसम्म आइपुग्दा विद्युत् पुनःस्थापनामा महत्वपूर्ण प्रगति भएको छ,' मन्त्री श्रेष्ठले भनेका छन् ।

उनकाअनुसार नुवाकोट र धादिङमा पूर्ण रूपमा विद्युत् आपूर्ति भइरहेको छ । 'नुवाकोटमा भदौ २४ मै र धादिङमा त त्यसअघि पूर्ण विद्युत आपूर्ति गर्न सफल भएका थियौं,' उनले भने ।

प्रकाशित मिति: शनिबार, असोज ३, २०८३

प्रतिक्रिया दिनुहोस्