अब यी रुटमा पनि चल्नेछन् रात्रिकालीन साझा बस

काठमाडौं । साझा यातायातले काठमाडौं उपत्यकामा रात्रिकालीन सार्वजनिक यातायात सेवा विस्तार गर्दै शनिबारदेखि थप रुटमा २८ वटा विद्युतीय बस सञ्चालनमा ल्याएको छ। संविधान दिवसको अवसर पारेर कम्पनीले रात्रिकालीन सेवा चार गुणाले विस्तार गरेको हो।

Watch On

साझा यातायातका प्रमुख कार्यकारी अधिकृत (सीईओ) भूपेन्द्र अर्यालका अनुसार गत वैशाख १ गतेदेखि दुई रुटमा सात वटा बसमार्फत रात्रिकालीन सेवा सुरु गरिएको थियो। हाल नागढुंगा–एयरपोर्ट र लगनखेल–बुढानीलकण्ठ रुटमा सञ्चालन हुँदै आएको सेवा अब थप रुटमा विस्तार गरिएको हो।

नयाँ व्यवस्थाअनुसार बूढानीलकण्ठ–गोदावरी रुटमा ६ वटा, जगाती–रत्नपार्क–ठमेलमा ६ वटा, विमानस्थल–नागढुंगामा ४ वटा, कीर्तिपुर–जमलमा ४ वटा तथा चक्रपथ परिक्रमाका लागि दुवैतर्फ ८ वटा विद्युतीय बस सञ्चालन हुनेछन्। यसअघि सञ्चालनमा रहेका नागढुंगा–एयरपोर्ट र लगनखेल–बुढानीलकण्ठ रुटमा क्रमशः चार र तीन वटा बस चल्नेछन्।

रात्रिकालीन बसहरू सम्बन्धित प्रस्थानबिन्दुबाट बेलुका ८ बजेदेखि राति ११ बजेसम्म छुट्नेछन्। यात्रुको चाप र आवश्यकताअनुसार बसको संख्या तथा सेवा समय समायोजन गर्न सकिने कम्पनीले जनाएको छ।

साझा यातायातले रातिको समयमा सार्वजनिक सवारी साधनको उपलब्धता कम रहेको र उपत्यकामा सार्वजनिक यातायातको माग बढ्दै गएको अवस्थालाई ध्यानमा राखेर सेवा विस्तार गरेको जनाएको छ। नयाँ सेवाबाट अबेरसम्म काम गर्ने कर्मचारी, विद्यार्थी, स्वास्थ्यकर्मी, सुरक्षाकर्मी तथा अन्य यात्रुलाई सहज हुने अपेक्षा गरिएको छ।