काँस फुलेको याम (तस्बिरकथा)

काठमाडौँ। मनसुनको प्रभाव पूर्ण रूपमा हटिनसके पनि काठमाडौँ उपत्यकाका खुला डाँडाकाँडा, मैदान तथा नदी किनारका क्षेत्रमा काँस फुल्न थालेका छन्। सेता र आकर्षक फूलले ढकमक्क बनेका काँसका झाडीले राजधानीको वातावरणमा शरद ऋतुको आगमनको संकेत दिन थालेका छन्।

Watch On

घाँस प्रजातिमा पर्ने काँस सेता बालाहरू हावाको मन्द झोक्कासँगै लहरिँदा खुला क्षेत्रमा मनमोहक दृश्य देखिन थालेको छ। केही दिनयता उपत्यकाका खाली जमिन तथा डाँडाकाँडामा काँस फुलेपछि प्रकृतिको दृश्य अवलोकन गर्न तथा तस्बिर खिच्न पुग्नेहरू पनि बढेका छन्।

काँस सामान्यतया वर्षायाम सकिँदै शरद ऋतु सुरु हुने समयमा फुल्ने गर्छ। नेपालमा काँसलाई ऋतु परिवर्तनको प्राकृतिक संकेतका रूपमा पनि लिइन्छ। विशेषगरी दशैं–तिहारजस्ता प्रमुख चाडपर्व नजिकिँदै गर्दा गाउँघरदेखि सहरसम्म फुलेका काँसले वातावरणमा छुट्टै रौनक थप्ने गरेको छ।

काठमाडौँका खुला क्षेत्रहरूमा अहिले देखिएका सेता काँसका फूलले हरियालीबीच सेतो गलैँचा ओछ्याएझैँ देखिन थालेका छन्। कतिपय स्थानमा सडक तथा बस्ती आसपासका खाली जमिनमा समेत काँस फुलेका छन्। बिहान र साँझको समयमा हल्का घाम पर्दा काँसका सेता फूल अझ आकर्षक देखिने गर्दछन्।

नेपालमा मनसुन बाहिरिने समय भने हरेक वर्ष एकै हुँदैन। सामान्यतया सेप्टेम्बरको अन्त्यदेखि अक्टोबरको सुरुआततिर मनसुन क्रमशः कमजोर हुँदै बाहिरिने भए पनि मौसम प्रणालीमा हुने परिवर्तनका कारण यसको समय अघि–पछि हुने गर्छ। त्यसैले काँस फुल्न थाले पनि मनसुन तत्कालै पूर्ण रूपमा समाप्त भएको संकेत भने मानिँदैन।

वर्षाका कारण ओसिलो बनेका जमिनमा काँस फुल्न थालेसँगै उपत्यकाको प्राकृतिक दृश्यमा समेत परिवर्तन देखिन थालेको छ। हरिया डाँडाकाँडा र खुला मैदानबीच फुलेका सेता काँसले प्रकृतिप्रेमी तथा फोटोग्राफीमा रुचि राख्नेहरूलाई आकर्षित गरिरहेका छन्।

काँसको फूललाई नेपाली समाजमा शरद ऋतु, चाडपर्व र नयाँ मौसमसँग जोडेर हेर्ने गरिन्छ। दशैंको आगमनसँगै गाउँघरका बाटाघाटा, नदी किनार र खेतबारी आसपासमा देखिने काँसका फूल नेपाली ग्रामीण जीवनको मौलिक दृश्यसमेत बन्ने गरेका छन्।

मनसुनको झरी पूर्ण रूपमा रोकिएको छैन। आकाशमा बादल र जमिनमा वर्षाको प्रभाव कायमै रहे पनि प्रकृतिले भने शरद ऋतुको आगमनको खबर दिन थालिसकेको छ। राजधानीका डाँडाकाँडामा ढकमक्क फुलेका काँसका सेता फूल त्यसैको सुन्दर संकेत बनेका छन्।

 तस्बिर : सुर्याम्स उप्रेती / नेपाल फोटो लाइब्रेरी