मनास्लुमा ७ फिट हिउँमा पुरिएर विदेशी आरोही र शेर्पा गाइडको मृत्यु

काठमाडौं । विश्वको आठौं अग्लो हिमाल मनास्लुमा हिमपहिरोमा परी एक विदेशी आरोही र उनका शेर्पा गाइडको मृत्यु भएको पुष्टि भएको छ। क्याम्प–३ स्थित टेन्टमा करिब सात फिट बाक्लो हिउँले पुरिएको अवस्थामा उनीहरू बिहीबार बिहान मृत फेला परेका हुन्।

Watch On

मृत्यु हुनेमा भारतीय–जर्मन आरोही ध्रुव ज्योति गुहा र मकालुका शेर्पा फुर्सेम्बा शेर्पा रहेका छन्। आधार शिविरका स्रोतले उनीहरू क्याम्प–३ को टेन्टभित्र मृत अवस्थामा फेला परेको पुष्टि गरेका छन्।

‘मकालु एड्भेन्चर’का प्रबन्ध निर्देशक मोहन लम्सालका अनुसार उनीहरू गएराति आएको नयाँ हिमपहिरोमा टेन्टसहित पुरिएको पाइएको छ।

खराब मौसमका कारण क्याम्प–२ बाट अन्य आरोहीहरू आधार शिविरतर्फ फर्किरहेका बेला गुहा र फुर्सेम्बाले भने शिखर आरोहणको प्रयास गरेका थिए। उनीहरू बुधबार साँझ क्याम्प–३ तर्फ लागेका थिए।

उनीहरूसँग सम्पर्क टुटेपछि ‘मकालु एड्भेन्चर’को उद्धार टोली बिहीबार बिहान क्याम्प–३ पुगेको थियो। टोलीले करिब सात फिट हिउँले पुरिएको टेन्टभित्र दुवै जनालाई मृत अवस्थामा फेला पारेको लम्सालले बताए।

‘यसले उनीहरूको टेन्ट हिमपहिरोमा पुरिएको देखाउँछ,’ उनले भने।

मृतकहरूको शव निकालेर आधार शिविरसम्म ल्याउने प्रयास भइरहेको लम्सालले जानकारी दिएका छन्।

यस घटनासँगै यो सिजनमा मनास्लुमा मृत्यु हुने आरोही तथा सहयोगीको संख्या चार पुगेको छ। यसअघि सिंगापुरका आरोही लाउ वी सेङको क्याम्प–२ मुनि र स्थानीय भरिया टासी शेर्पाको आधार शिविरस्थित टेन्टमा मृत्यु भएको थियो।