‘बंगालको खाडीमा विकसित पानी पार्ने प्रणाली बलियो बन्दैछ, नेपालमा यसको असरबारे अहिले नै यकिन गर्न सकिँदैन’

काठमाडौं । बंगालको खाडीको पूर्वी भू–भागमा विकसित न्यून चापीय प्रणाली थप बलियो बन्दै पश्चिम–उत्तरपश्चिमतर्फ सर्ने प्रक्षेपण गरिएको छ। उक्त प्रणालीका कारण नेपालमा वर्षा हुने सम्भावना रहे पनि वर्षाको जोखिम र त्यसबाट हुन सक्ने असरबारे अहिले नै यकिन गर्न नसकिने राष्ट्रिय विपद जोखिम न्यूनीकरण तथा व्यवस्थापन प्राधिकरणले बताएको छ।

Watch On

मौसम तथ्याङ्क, मौसम मोडल तथा भू–उपग्रहबाट प्राप्त तस्बिर र तथ्याङ्कको विश्लेषणअनुसार उत्तर अन्डमान सागर तथा आसपासको क्षेत्रमा विकसित प्रणाली असोज ७ गते (सेप्टेम्बर २३) आसपास ‘डिप्रेसन’ अर्थात् न्यून चापीय क्षेत्रका रूपमा थप बलियो हुने देखिएको प्राधिकरणको भनाइ छ।

हालको प्रक्षेपणअनुसार उक्त प्रणाली दक्षिण ओडिशा र उत्तर आन्ध्र प्रदेशको तटीय क्षेत्रनजिकबाट जमिनतर्फ प्रवेश गर्ने सम्भावना छ।

मौसम पूर्वानुमान महाशाखाले प्रणालीको निरन्तर निगरानी भइरहेको जनाएको छ। महाशाखाका अनुसार प्रणालीको विकास र त्यसको मार्गमा हुने परिवर्तनका आधारमा नेपालमा पर्ने वर्षाको जोखिम र सम्भावित प्रभाव पनि फरक पर्न सक्छ।

‘हालसम्मको प्रक्षेपणले उक्त प्रणालीको कारण नेपालमा वर्षा गराउने देखिए पनि वर्षाको जोखिमको स्तर र हुन सक्ने सम्भावित असरबारे अहिलेसम्म यकिन गर्न सकिने अवस्था छैन,’ सूचनामा भनिएको छ।

महाशाखाले मौसम प्रणालीको थप विकास र त्यसको प्रभावबारे आवश्यकताअनुसार सूचना अद्यावधिक गर्दै जाने जनाएको छ। सर्वसाधारणलाई मौसमसम्बन्धी आधिकारिक तथा पछिल्लो जानकारीका लागि विभागको वेबसाइट र सामाजिक सञ्जालमार्फत जारी हुने सूचना हेर्न आग्रह गरिएको छ।