मलेसियाका लागि प्रस्तावित राजदूत चुडामणि खरेलको सुनुवाइ होल्ड, के के छन् आरोप ?

काठमाडौँ । मलेसियाका लागि प्रस्तावित राजदूत चुडामणि खरेलको संसदीय सुनुवाइ होल्ड भएको छ । बुधबार संसदीय सुनुवाइ समितिमा भएको सुनुवाइका क्रममा उनीमाथि स्वार्थको द्वन्द्व देखिएको आरोपसहितका प्रश्न सांसदहरुले तेर्स्याएका थिए । 

Watch On

सुनुवाईको क्रममा रास्वपा सांसद राजीव खत्रीले झापामा स्थानीयहरूसँग अनुदान मिलाइदिन्छु भनेर लाखौँ रुपैयाँ लिएको,  राजदूत नियुक्तीका लागि सिफरिस भएसँगै तिर्न सुरु गरेको, कतिपयलाई पैसा लिइसकेपछि ब्ल्याकलिस्टमा राखेको, केही म्यानपावरसँग राजदूत भएर काम गर्छु भनेर केही रकम लिएको र तिनै व्यक्तिहरुले उपलब्ध गराएको गाडी चढ्ने गरेको भनेर आफूलाई प्रमाणसहित उजुरी आएको भन्दै प्रश्न गरेको थियो ।

त्यतिमात्र होइन सांसद खत्रीले पोखराको सार्वजनिक जग्गा मिलाइदिन्छु भनेर करोडौँ रुपैयाँ लिएको भन्ने उजुरीको बारेमा पनि प्रश्न गरे ।

तर जवाफमा खरेलले सबै आरोपलाई अस्वीकार गरे । उनले आफूमाथि लगाइएका सबै आरोप निराधार भएको दावी गरे । 

रास्वपा संसदीय दलका प्रमुख सचेतक कविन्द्र बुर्लाकोटीले प्रस्तावित राजदूत खरेलका विषयमा थप अध्ययन गरेर, आवश्यक परे थप सुनुवाईमा बोलाउन सकिने धारणा राखे । 

त्यस्तै नेकपा सांसद वर्षमान पुनले खरेलका विषयमा धेरै बिषय उठेकाले थप छलफलको आवश्यकता देखिएको उल्लेख गरे । एमाले संसदीय दलका उपनेता पद्मा अर्यालले समितिमा उजुरी नपर्दा पनि शंका गर्नुपर्ने धेरै तथ्यहरु सार्वजनिक भइसकेको अवस्थामा थप अध्ययन आवश्यक रहेको बताइन् । 

प्रस्तावित राजदूत खरेलले आफूमाथि लागेका सम्पूर्ण आरोपहरुमा कुनै सत्यता नरहेको बताएका थिए । अनुचित कारोबारका कुनै पनि तथ्य प्रमाण भेटिए त्यसलाई पुष्टि गर्न उनले चूनौति दिए । उनले आफुले अनुदान मिलाइने भन्दै कसैसंग रकम नलिएको उनको दावी छ । 

सांसदहरुले थप अध्ययन गर्नुपर्ने माग राखेपछि समिति सभापति वोधनारायण श्रेष्ठले प्रस्तावित राजदूत खरेलका विषयमा थप अध्ययन गर्नुपर्ने भएको र त्यसपछि मात्रै आवश्यक सुनुवाई प्रक्रिया अघि बढाइने बताए ।