इजरायलमा २७ वर्षपछि धेरै मतदानको रेकर्ड, तर नेतन्याहूको पार्टीलाई धक्का !

जेरुसेलम । इजरायलमा मङ्गलबार सम्पन्न आमनिर्वाचनमा ७७.७ प्रतिशतको ऐतिहासिक मतदान भएको छ। केन्द्रीय निर्वाचन आयोगका अनुसार सन् १९९९ पछिकै यो सबैभन्दा उच्च मतदान प्रतिशत हो।

Watch On

रेकर्ड मतदानका बीच सार्वजनिक भएका एक्जिट पोलहरूले प्रधानमन्त्री बेन्जामिन नेतान्याहू र उनको गठबन्धनलाई ठूलो धक्का लाग्ने सङ्केत गरेका छन्।

एक्जिट पोलहरूले देशमा कुनै पनि पक्षलाई स्पष्ट बहुमत नदिने त्रिशंकु संसद (हङ पार्लियामेन्ट) को सङ्केत गरेका छन्। वर्तमान प्रधानमन्त्री बेन्जामिन नेतान्याहू र उहाँका मुख्य प्रतिस्पर्धी पूर्व सेनाप्रमुख गादी आइजेनकोट दुवै पक्ष ६१ सीटको स्पष्ट बहुमत पुर्‍याउन सङ्घर्षरत देखिएका छन्।

एक्जिट पोलकाअनुसार १२० सदस्यीय इजरायली संसद (नेसेट) मा नेतान्याहूको 'लिकुड' पार्टी सबैभन्दा ठूलो एकल पार्टीका रूपमा उभिनेछ। तर, यसअघि ३२ सीट जितेको लिकुड यसपटक २४ देखि २५ सीटमा खुम्चिने प्रक्षेपण गरिएको छ।

सरकार गठनका लागि आवश्यक ६१ सीटको स्पष्ट बहुमत नेतान्याहूको दक्षिणपन्थी धार्मिक गठबन्धनले प्राप्त गर्न सक्ने देखिँदैन। उनको खेमा ५० देखि ५३ सीटमा सीमित हुने अनुमान गरिएको छ।

विपक्षी 'परिवर्तन गठबन्धन' को कडा टक्कर

पूर्व सेनाप्रमुख गादी आइजेनकोटको नेतृत्वमा रहेको नयाँ 'याशर' पार्टी र उनको 'परिवर्तन गठबन्धन' ले नेतान्याहूको खेमालाई कडा टक्कर दिएको छ। 'याशर' पार्टीले २२ देखि २३ सीट प्राप्त गर्ने प्रक्षेपण छ । विपक्षीहरूको यो गठबन्धनले पनि ५१ देखि ५३ सीट पाउने अनुमान छ।

तथापि, नेतान्याहू वा विपक्षी गठबन्धन कसैले पनि सरकार बनाउने स्पष्ट बहुमत हासिल गर्न सकेका छैनन्।

राजनीतिक टिप्पणीकारहरूका अनुसार लिकुड सबैभन्दा ठूलो पार्टी बन्नु नेतान्याहूका लागि केवल एउटा "अर्थहीन सांत्वना पुरस्कार" मात्र साबित भएको छ, किनकि सत्ता जोगाउन चाहिने बहुमत उनको पहुँचबाहिर देखिन्छ।

'द इकोनोमिस्ट' का इजरायल प्रतिनिधि एन्शेल फेफरका अनुसार, "नेतान्याहू पहिले पनि आश्चर्यजनक पुनरागमनका लागि चिनिएका छन्, तर उनका लागि यो रात अत्यन्तै खराब साबित भएको छ।"

इजरायलको इतिहासमा आजसम्म कुनै पनि पार्टीले एक्लै स्पष्ट बहुमत हासिल गर्न सकेको छैन। आगामी सरकार कस्तो बन्नेछ भन्ने कुरा अब साना दलहरूसँग हुने गठबन्धनको मोलमोलाइमा निर्भर हुनेछ।