मुस्ताङ भन्सारबाट साढे तीन महिनामै ११ अर्ब ४५ करोड राजस्व सङ्कलन

मुस्ताङ । नेपाल–चीन उत्तरी कोरलानाकास्थित मुस्ताङ भन्सार कार्यालयले चालु आर्थिक वर्षको साढे तीन महिनामै रु ११ अर्ब ४५ करोड ४७ लाख राजस्व सङ्कलन गरेको छ ।

Watch On

चालु आर्थिक वर्ष २०८३/८४ मा रु नौ अर्ब राजस्व सङ्कलन गर्ने लक्ष्य राखेको कार्यालयले कात्तिक १३ गतेसम्ममै लक्ष्यभन्दा रु दुई अर्ब ४५ करोड ४७ लाख बढी राजस्व उठाएको हो ।

भन्सार अधिकृत अमिन्द्र सिंहका अनुसार साउनदेखि कात्तिक १३ गतेसम्म कोरलानाकाबाट रु २६ अर्ब एक करोड २३ लाख मूल्यबराबरका मालवस्तु आयात भएका छन् । यस अवधिमा नेपालबाट रु २८ करोड ६३ लाख मूल्यबराबरका वस्तु चीनतर्फ निकासी भएका छन् ।

यस अवधिमा चीनबाट आयात गरिएका विभिन्न कम्पनीका छ हजार ५०१ विद्युतीय सवारीसाधन (ईभी) को भन्सार जाँचपास भएको सिंहले जानकारी दिए ।

गत आर्थिक वर्ष मुस्ताङ भन्सार कार्यालयले रु छ अर्ब ९२ करोड राजस्व सङ्कलन गरेको थियो । यस वर्ष दसैँअघि असोज २७ गतेसम्म रु आठ अर्ब ३२ करोड ८३ लाख राजस्व सङ्कलन भएकामा त्यसपछि थप रु तीन अर्ब १२ करोड ६४ लाख उठेको सिंहले बताए ।

दसैँअघि कोरलानाकाबाट रु १० अर्ब ४० करोड ६९ लाख मूल्यबराबरका चिनियाँ मालवस्तु आयात भएकामा दसैँपछि थप रु छ अर्ब ७० करोड ५४ लाख मूल्यबराबरका सामान भित्रिएका छन् ।

त्यसैगरी, साउनदेखि असोज २७ गतेसम्म कोरलानाकाबाट तीन हजार ९२६ विद्युतीय सवारीसाधन नेपाल भित्रिएका थिए । दसैँपछिको १५ दिनमा थप दुई हजार ५७५ विद्युतीय सवारीसाधनको भन्सार जाँचपास भएको सिंहले जानकारी दिए ।

उनका अनुसार रसुवागढी र तातोपानी नाका पूर्ण रूपमा बन्द भएपछि कोरलानाकाबाट आयात–निर्यात कारोबार बढेको हो । रसुवाको भोटेकोशीमा आएको विनाशकारी बाढीपछि व्यापारिक मार्ग परिवर्तन हुँदा सयौँ कन्टेनरका सामान कोरलानाकाबाट आयात भएका छन् ।

चीनसँगको एकमात्र वैकल्पिक नाकाका रूपमा स्थापित हुँदै गएको कोरलानाकाबाट तयारी पोसाक, कस्मेटिक सामग्री, विद्युतीय उपकरण, औद्योगिक कच्चा पदार्थ, खाद्यान्न, फलफूल, चाडपर्व लक्षित सामग्री तथा विद्युतीय सवारीसाधन आयात भइरहेका छन् ।

नेपाल–चीन उत्तरी कोरलानाका सरकारले गत वर्ष भदौ ३१ गतेदेखि पूर्ण रूपमा सञ्चालनमा ल्याएको थियो ।