इनम सापकोटा प्रकरणमा सत्ताको दुरुपयोग र छाडातन्त्र हावी भयो : महामन्त्री संग्रौला

काठमाडौँ । नेपाली कांग्रेसकी महामन्त्री डा. डिला संग्रौलाले इनम सापकोटा प्रकरणमा सरकारमाथि गम्भीर आरोप लगाएकी छन् ।

Watch On

सत्ताको दुरुपयोग र गैरजिम्मेवार व्यवहारले मुलुकमा सुशासन नभई ‘छाडातन्त्र’ हावी भएको टिप्पणी गर्दै उनले सरकारको तीव्र आलोचना गरेकी हुन् ।

बुधबार एक वक्तव्य जारी गर्दै नेता संग्रौलाले इनम सापकोटा प्रकरणले वर्तमान सरकारले कसरी सत्ताको दुरुपयोग गरिरहेको छ भन्ने कुरा घामजस्तै छर्लङ्ग भएको दाबी गरिन् । देशको नेतृत्व र प्रशासनिक जवाफदेहितामाथि प्रश्न उठाउँदै उनले भनिन्, 'देशमा प्रधानमन्त्री बालेन शाह छन् कि को छन् भन्ने कुरा आम मान्छेले भेउ पाउन छाडिसकेका छन् ।'

नेपाली कांग्रेसमाथि सत्ताको बलमा राजनीतिक आक्रमण गर्न खोजिएको आरोप लगाउँदै संग्रौलाले सरकारका गल्तीहरूको मुकुन्डो चाँडै उघारिने चेतावनी दिइन् । प्रहरी हिरासतमा रहेका अभियुक्तको मोबाइल फोन फरेन्सिक परीक्षणका लागि पठाउनुअघि नै प्रधानमन्त्रीका प्रमुख सल्लाहकारले दुई दिनसम्म आफ्नै घरमा लुकाएर राखेको भनी जिम्मेवार सञ्चारमाध्यमहरूबाट समाचार सार्वजनिक भइसकेको भन्दै उनले यस विषयमा सरकारको ध्यानाकर्षण गराएकी छन् ।

'प्रहरी नियन्त्रणमा हुनुपर्ने प्रमाण सल्लाहकारको घरमा पुग्नु गम्भीर विषय हो। अब यसको स्पष्ट र चित्तबुझ्दो जवाफ दिने पालो सत्ता र सत्तारुढ दलको हो,' संग्रौलाले भनिन्, 'कि बालेनराजमा प्रश्न प्रतिपक्षलाई मात्रै गरिन्छ ?'

कांग्रेसले लोकतन्त्रको सतत पहरेदारका रूपमा सत्ताका यस्ता गैरकानुनी र स्वेच्छाचारी कदमविरुद्ध आवाज उठाइरहने र सरकारलाई जवाफदेही बनाउन पछि नहट्ने स्पष्ट पारेको छ ।