समाज

पोखरामा बोलेरो जिप दुर्घटना हुँदा एकको मृत्यु, १२ जना घाइते

सिधाकुरा

बिहीबार, कात्तिक २६, २०८३

पोखरामा बोलेरो जिप दुर्घटना हुँदा एकको मृत्यु, १२ जना घाइते

पोखरा । कास्कीको पोखरा महानगरपालिका–२३ दुण्डेफाँटमा बोलेरो जिप दुर्घटना हुँदा एक जनाको मृत्यु भएको छ भने १२ जना घाइते भएका छन्।

Watch On

दुर्घटनामा घाइते भएका पर्वत घर भई हाल पोखरा महानगरपालिका–२४ पामे बस्ने २३ वर्षीय मिलन गुरुङको उपचारका क्रममा आज बिहान २ः४२ बजे मृत्यु भएको प्रहरीले जनाएको छ।

दुर्घटनामा घाइते भएका अन्य १२ जनाको पोखरास्थित जीएमसी अस्पतालमा उपचार भइरहेको छ। घाइतेमध्ये अधिकांश किशोरकिशोरी छन्। उनीहरूको उमेर ११ देखि २० वर्षसम्म रहेको छ।

प्रहरीका अनुसार बिहीबार राति करिब ९ः४० बजे पर्वतको पैयुँ गाउँपालिका–७ घर भई हाल पोखरा महानगरपालिका–२४ लौरुक बस्ने २३ वर्षीय टोकबहादुर गुरुङले चलाएको ग ४ च १३४४ नम्बरको बोलेरो जिप घाटीछिनाबाट पोखरातर्फ आउने क्रममा अनियन्त्रित भएर दुर्घटनामा परेको हो।

दुर्घटनामा घाइते भएकामध्ये सात जनाको अवस्था मध्यम र चार जनाको अवस्था सामान्य रहेको छ। एक जनाको चोटपटकको अवस्थाबारे छुट्टै विवरण खुलाइएको छैन।

प्रहरीले जिप चालक टोकबहादुरलाई नियन्त्रणमा लिएको छ। चालकले मादक पदार्थ सेवन गरेको र उनीसँग सवारी चालक अनुमतिपत्र रहेको प्रारम्भिक अनुसन्धानबाट खुलेको प्रहरीले जनाएको छ।

घटनाबारे थप अनुसन्धान भइरहेको छ।

प्रकाशित मिति: बिहीबार, कात्तिक २६, २०८३

प्रतिक्रिया दिनुहोस्