परराष्ट्रमन्त्री खनालद्वारा हिन्दुकुश हिमालय क्षेत्रमा क्षेत्रीय सहकार्य सुदृढ गर्न जोड

काठमाडौं। परराष्ट्रमन्त्री शिशिर खनालले जलवायु परिवर्तनका चुनौती सामना गर्न तथा विपद् उत्थानशीलता बढाउन हिन्दुकुश हिमालय क्षेत्रमा क्षेत्रीय सहकार्यका संयन्त्र सुदृढ गर्नुपर्ने बताएका छन्।

Watch On

जलवायु परिवर्तनसम्बन्धी राष्ट्रसङ्घीय सम्मेलन (कोप–३१) को अवसरमा टर्कीको आन्ताल्यास्थित नेपाल पेभिलियनमा आयोजित एक विशेष कार्यक्रममा मुख्य मन्तव्य दिँदै मन्त्री खनालले यस्तो बताएका हुन्।

उनले जलवायुजन्य जोखिमलगायत साझा चुनौतीको प्रभावकारी सामना गर्न क्षेत्रीय सहकार्यका संरचनालाई बलियो बनाउनुपर्नेमा जोड दिए। हिन्दुकुश हिमालय क्षेत्रमा विपद् उत्थानशीलता विकास गर्न पनि सामूहिक प्रयास आवश्यक रहेको उनको भनाइ थियो।

मन्त्री खनालले पृथ्वीको पारिस्थितिकीय स्वास्थ्य र मानवजातिको सामूहिक हित संरक्षणका लागि क्षेत्रीय तथा विश्वव्यापी ऐक्यबद्धता अझ गहिरो बनाउनुपर्ने बताए।

त्यसैगरी जलवायु परिवर्तन न्यूनीकरण, अनुकूलन, प्रविधि हस्तान्तरण तथा ज्ञान र सफल अभ्यासको आदानप्रदानमा नीतिगत समन्वय र सहकार्य बढाउनुपर्नेमा उनले जोड दिए। यसका लागि सरकार, अन्तर्राष्ट्रिय संस्था, विज्ञ तथा अन्य सरोकारवालाबीचको साझेदारी आवश्यक रहेको उनको भनाइ थियो।

‘हिन्दुकुश हिमालयका लागि क्षेत्रीय सहकार्य संयन्त्र : सीमापार जलवायु विपद्बाट प्राप्त सिकाइ’ शीर्षकको उक्त कार्यक्रममा कोप–३१ मा सहभागी नीतिनिर्माता, क्षेत्रीय विज्ञ, जलवायु अभियन्ता तथा विभिन्न सरोकारवालाको सहभागिता थियो।