मधेसका मुख्यमन्त्रीले कात्तिक २८ मा विश्वासको मत लिने

जनकपुरधाम । मधेस प्रदेशका मुख्यमन्त्री कृष्णप्रसाद यादवले कात्तिक २८ गते प्रदेशसभाबाट विश्वासको मत लिने भएका छन्।

Watch On

विश्वासको मत लिने प्रयोजनका लागि प्रदेशसभाको बैठक कात्तिक २८ गते दिउँसो १ बजेका लागि आह्वान गरिएको सभामुख रामअशिष यादवले जानकारी दिए।

बैठक सञ्चालन र कार्यसूची तय गर्न कात्तिक २७ गते दिउँसो प्रदेशसभाको कार्यव्यवस्था परामर्श समितिको बैठक बस्नेछ।

सरकारमा सहभागी नेकपा एमाले र नेपाली कम्युनिष्ट पार्टीले समर्थन फिर्ता लिएपछि मुख्यमन्त्री यादवले विश्वासको मत लिन लागेका हुन्। विश्वासको मतका लागि मुख्यमन्त्री यादवले प्रदेशसभा सचिवालयलाई बुधबार नै पत्राचार गरेका थिए।

मुख्यमन्त्री यादवले विश्वासको मत प्राप्त गर्न विभिन्न राजनीतिक दलसँग संवाद भइरहेको र मतदान हुनुअघिसम्म पनि संवाद जारी रहने बताएका छन्।

नेपाली कांग्रेस नेतृत्वको सरकारमा सहभागी एमालेका चार मन्त्रीले असोज २५ गते सामूहिक राजीनामा दिँदै समर्थन फिर्ता लिएका थिए। त्यसैगरी, नेपाली कम्युनिष्ट पार्टीका चार मन्त्रीले कात्तिक २० गते राजीनामा दिँदै सरकारलाई दिएको समर्थन फिर्ता लिएका थिए।

दुई दलले समर्थन फिर्ता लिएपछि मुख्यमन्त्री यादव सरकारको बहुमत जोगाउने प्रयासमा छन्।

१०७ सदस्यीय मधेस प्रदेशसभामा सरकार गठनका लागि कम्तीमा ५४ सदस्यको समर्थन आवश्यक पर्छ। प्रदेशसभामा नेपाली कांग्रेसका २२, एमालेका २३, जसपा नेपालका २७, नेपाली कम्युनिष्ट पार्टीका १५ र जनमत पार्टीका १२ सदस्य छन्। त्यस्तै, संघीय समाजवादी पार्टी र राष्ट्रिय प्रजातन्त्र पार्टीका एक–एक सदस्य छन्।