आवास महँगीविरुद्ध स्पेनमा देशव्यापी हडताल, प्रदर्शनकारी र प्रहरीबीच झडप

म्याड्रिड । आवासको चर्को मूल्य, बढ्दो घरभाडा र जीवनयापनको लागतविरुद्ध स्पेनमा भएको देशव्यापी २४ घण्टे आमहडतालका क्रममा हजारौँ मानिस सडकमा उत्रिएका छन्। बुधबार भएको प्रदर्शनका क्रममा राजधानी म्याड्रिड र बार्सिलोनामा प्रहरी तथा प्रदर्शनकारीबीच झडप भएको छ।

Watch On

प्रहरीले प्रदर्शनकारीलाई तितरबितर पार्न अश्रुग्यास र रबरका गोली प्रयोग गरेको छ। सरकारी अधिकारीहरूका अनुसार म्याड्रिडमा करिब एक लाख २० हजार र बार्सिलोनामा ५५ हजारभन्दा बढी मानिस प्रदर्शनमा सहभागी भएका थिए। आयोजकले भने बार्सिलोनामा चार लाखसम्म सहभागी भएको दाबी गरेका छन्।

सन् २०१२ यताकै पहिलो राष्ट्रव्यापी २४ घण्टे आमहडतालका क्रममा लाखौँ श्रमिकले काम रोकेका थिए। प्रदर्शनका क्रममा मास्क र हुड लगाएका केही समूहले प्रहरीमाथि वस्तु प्रहार गर्नुका साथै सडकमा फोहोरका कन्टेनरमा आगजनी गरेका थिए। विभिन्न घटनामा देशभर दर्जनौँ प्रदर्शनकारी पक्राउ परेका छन्।

प्रदर्शनकारीले आवासको मूल्य नियन्त्रण, घरभाडा घटाउनुपर्ने र सर्वसाधारणका लागि सुलभ आवासको व्यवस्था गर्नुपर्ने माग गरेका छन्। म्याड्रिडमा प्रदर्शनकारीले घरको आकारका प्लेकार्ड बोकेर ‘हामीसँग घर छैन’ भन्दै नाराबाजी गरेका थिए। बार्सिलोनामा पनि हजारौँले भाडा नियन्त्रणको माग गरेका थिए।

प्रदर्शनकारीका अनुसार आम्दानीको ठूलो हिस्सा घरभाडामै खर्च गर्नुपर्ने अवस्था छ। पछिल्लो एक दशकमा स्पेनमा घरभाडा करिब ८० प्रतिशतले बढेको छ। यसबाट विशेषगरी युवा र न्यून आय भएका परिवार प्रभावित भएका छन्।

हडतालका कारण सार्वजनिक यातायात, विद्यालय, औद्योगिक प्रतिष्ठान र केही व्यावसायिक गतिविधिमा असर परेको थियो। मजदुर सङ्गठन युजिटी र कमिसोनेस ओब्रेरासले हडतालमा उल्लेख्य सहभागिता रहेको भन्दै सफल भएको बताएका छन्। तर रोजगारदाता सङ्गठनले अधिकांश क्षेत्रमा कामकाज सामान्य रहेको दाबी गरेका छन्।

आगामी नोभेम्बर २९ मा हुने आमनिर्वाचनअघि भएको प्रदर्शनलाई प्रधानमन्त्री पेड्रो सान्चेजको सरकारमाथिको जनदबाबका रूपमा पनि हेरिएको छ।

सन् २०२७ मा हुनुपर्ने निर्वाचन सान्चेजले यसै वर्ष अगाडि सारेका हुन्। आवास सङ्कट समाधान गर्न सरकारले अघि सारेका सुधारसम्बन्धी प्रस्ताव संसद्बाट पारित हुन नसकेपछि उनले मध्यावधि निर्वाचन घोषणा गरेका थिए। त्यसपछि श्रमिक सङ्गठनहरूले आवास सङ्कट र बढ्दो जीवनयापन खर्चको मुद्दालाई निर्वाचनअघि प्रमुखताका साथ उठाउँदै हडताल आह्वान गरेका हुन्।