दुर्घटनामा गर्भवती श्रीमती, तीन छोरी र दुई भाइ गुमाएका अवधेश अस्पताल भर्ना

हेटौंडा । मकवानपुरको भीमफेदी गाउँपालिका–६ चिसापानीगढीमा बिहीबार भएको सवारी दुर्घटनामा परिवारका ६ सदस्य गुमाएका सर्लाहीका अवधेश यादव आफैं अस्पताल भर्ना भएका छन्।

Watch On

दुर्घटनामा श्रीमती, तीन छोरी र दुई भाइ गुमाएपछि विक्षिप्त बनेका उनको रक्तचाप घटेर स्वास्थ्यमा समस्या आएको हो। उनको हेटौंडा अस्पतालको आकस्मिक कक्षमा राखेर उपचार भइरहेको छ।

अवधेशले दुर्घटनामा ३५ वर्षीया गर्भवती श्रीमती पुनमदेवी यादव, १० वर्षीया जेठी छोरी अनुकुमारी, ७ वर्षीया माइली छोरी दीक्षा र ५ वर्षीया कान्छी छोरी दीपिकालाई गुमाएका छन्।

त्यस्तै, उनका २६ वर्षीय सहोदर भाइ विकेश यादव र २४ वर्षीय सहोदर भाइ सुबोध यादवको पनि दुर्घटनामा मृत्यु भएको छ।

दुर्घटनामा घाइते भएका अवधेशका डेढ वर्षीय छोरा सुदीपको भने काठमाडौंमा उपचार भइरहेको छ।

यादव परिवार छठ मनाउन सर्लाहीको चक्रघट्टा गाउँपालिका–४ सुन्दरपुर टोलस्थित घर फर्कंदै थियो। बिहीबार बिहान भएको दुर्घटनामा १४ जनाको मृत्यु भएको छ भने ६ जना घाइते भएका छन्।

अवधेश भने गाडीमा सिट नपाएपछि परिवारसँगै आएका थिएनन्। आफू अर्को दिन आउने भन्दै उनले परिवारका सदस्यलाई गाडी चढाएर डेरामा फर्किएका थिए।

तर, बिहान सबेरै दुर्घटनाको खबर पाएपछि उनी हेटौंडा पुगे। आफूले घर पठाएका परिवारका सदस्य र आफन्तमध्ये एक जना मात्रै जीवित रहेको खबर पाएपछि उनी सम्हालिन सकेका छैनन्।

परिवारका ६ सदस्य गुमाएका अवधेश अहिले आफैं अस्पतालको शय्यामा छन्। दुर्घटनामा बाँचेका डेढ वर्षीय छोराको काठमाडौंमा उपचार भइरहेको छ।