बाबुराम भट्टराईको टिप्पणी- सडक दुर्घटना राज्यको संगठित अपराधजस्तै भयो

काठमाडौं । पूर्वप्रधानमन्त्री डा. बाबुराम भट्टराईले काठमाडौं–हेटौंडा सडकमार्गमा भएको पछिल्लो दुर्घटनामा एउटै गाउँका १४ जनाको मृत्यु र ६ जना घाइते भएको घटनालाई राज्यको लापरबाहीको परिणाम भन्दै सडक सुरक्षामा गम्भीर हुन सरकारसँग आग्रह गरेका छन्।

Watch On

उनले यस्ता घटनालाई सामान्य ‘दुर्घटना’ भनेर मात्रै बुझ्न नहुने बताएका छन्। सडक दुर्घटना रोक्न नसक्नु राज्यको गम्भीर असफलता भएको संकेत गर्दै उनले यस्ता घटनालाई ‘घुम्ने मेचमाथिका अन्धा मान्छे’ (भूपी शेरचनको शब्द सापटी) हरूको संगठित अपराधका घृणित नमुनाको संज्ञा दिएका छन्।

सामाजिक सञ्जालमार्फत आफ्नो धारणा सार्वजनिक गर्दै भट्टराईले आधुनिक नेपाल राज्य बनेयता पर्सा–मकवानपुर–काठमाडौं कोरिडोर सबैभन्दा बढी आवतजावत हुने मार्ग रहेको उल्लेख गरेका छन्।

त्यही आवश्यकतालाई ध्यानमा राखेर त्रिभुवन राजपथ (बाइरोडको बाटो), कान्ति राजपथ, भीमफेदी–बल्खु मार्ग र कुलेखानी–थानकोट मार्ग निर्माण हुँदै आएको उनको भनाइ छ। तर, काठमाडौं र तराई जोड्ने सुरुङमार्गको चर्चा पटकपटक भए पनि अहिलेसम्म निर्माण हुन नसकेको उनले बताएका छन्।

शहरी तथा क्षेत्रीय विकास योजनाको विद्यार्थीका रूपमा आफूले छोटो राष्ट्रिय जिम्मेवारीको अवधिमा काठमाडौंलाई तराई–मधेस र औद्योगिक तथा व्यापारिक केन्द्र हेटौंडा–वीरगञ्जसँग जोड्ने यातायात मार्गलाई सर्वोच्च प्राथमिकता दिनुपर्ने अवधारणा अघि सारेको उनले स्मरण गरेका छन्।

त्यसैअनुसार आफू प्रधानमन्त्री हुँदा १७ वटा ठूला पूर्वाधार आयोजनालाई राष्ट्रिय गौरवका आयोजना घोषणा गरेको र तीमध्ये पहिलो प्राथमिकतामा काठमाडौं–तराई/मधेस द्रुतमार्ग तथा निजगढ अन्तर्राष्ट्रिय विमानस्थललाई राखेर निर्माण प्रक्रिया अघि बढाएको उनको दाबी छ।

द्रुतमार्ग निर्माण हुन समय लाग्न सक्ने र हेटौंडा पश्चिम क्षेत्रको यातायात चापलाई समेत ध्यानमा राखेर भीमफेदी नजिकबाट अर्को सुरुङमार्ग निर्माण गर्ने योजना बनाइएको उनले बताएका छन्। उक्त योजनाबारे मन्त्रिपरिषद्बाट निर्णयसमेत गराएको उनको भनाइ छ।

तर, त्यसपछि उक्त योजना अघि नबढेकोप्रति असन्तुष्टि जनाउँदै भट्टराईले भनेका छन्, ‘ताक्छु मुढो, बञ्चरो ताक्छ घुँडो भनेझैं त्यसपछि के भयो र किन अहिलेसम्म जनताले अनाहकमा ज्यान फाल्नु परिरहेछ, इतिहासले एकदिन अवश्य मूल्यांकन गर्नेछ।’

उनले नयाँ युवाहरूको सरकारले विगतका निर्णय र योजनाको समीक्षा गर्दै काठमाडौं–तराई जोड्ने सुरक्षित र भरपर्दो यातायात मार्ग निर्माणका लागि आवश्यक पहल गर्नुपर्ने बताएका छन्।