भीमफेदी दुर्घटनाको कारण अध्ययन गर्न उच्चस्तरीय कार्यदल गठन गर्न कांग्रेसको माग

काठमाडौं । नेपाली कांग्रेसले मकवानपुरको भीमफेदीमा भएको माइक्रोबस दुर्घटनाको कारण अध्ययन गर्न उच्चस्तरीय कार्यदल गठन गर्न सरकारसँग माग गरेको छ।

Watch On

कांग्रेसले बिहीबार प्रेस विज्ञप्ति जारी गर्दै दुर्घटनाका कारणहरूको गहन अध्ययन गरी सडक सुरक्षा, सवारीसाधनको अवस्था, चालकको जिम्मेवारी र यातायात व्यवस्थापनमा देखिएका कमजोरी पहिचान गर्न माग गरेको हो।

काठमाडौंबाट सर्लाहीको चक्रघट्टा गाउँपालिका–४ सुन्दरपुर जाँदै गरेको माइक्रोबस बिहीबार बिहान भीमफेदी गाउँपालिका–६ चिसापानीगढीमा दुर्घटना हुँदा १४ जनाको घटनास्थलमै मृत्यु भएको थियो भने ६ जना घाइते भएका थिए।

कांग्रेसले दुर्घटनामा ज्यान गुमाउनेहरूप्रति श्रद्धाञ्जली अर्पण गर्दै शोकसन्तप्त परिवारजनमा समवेदना व्यक्त गरेको छ। साथै घाइतेहरूको शीघ्र स्वास्थ्यलाभको कामना गरेको छ।

मृतकका परिवारलाई तत्काल उचित राहत उपलब्ध गराउन र घाइतेको निःशुल्क तथा प्रभावकारी उपचारको व्यवस्था गर्न पनि कांग्रेसले सरकारसँग माग गरेको छ।

पछिल्लो समय देशभर सडक दुर्घटनाका घटना बढ्दै जानु गम्भीर चिन्ताको विषय भएको उल्लेख गर्दै कांग्रेसले सडक दुर्घटनाको जोखिम न्यूनीकरणका लागि तत्काल प्रभावकारी कदम चाल्न सरकारको ध्यानाकर्षण गराएको छ।

कांग्रेसका कार्यवाहक मुख्यसचिव कृष्णप्रसाद दुलालद्वारा जारी विज्ञप्तिमा सडक सुरक्षा र यातायात व्यवस्थापनमा नीतिगत तथा व्यावहारिक सुधार गर्नसमेत माग गरिएको छ।