रामेछापमा १२०० मेगावाटको जलाशय आयोजना अघि बढाउन तीन करोड बजेट

काठमाडौँ । रामेछापको विकास र समृद्धिसँग जोडिएको एक हजार २१६ मेगावाट क्षमताको खिम्ती–ठोसे–शिवालय बृहत् जलाशययुक्त बहुउद्देश्यीय आयोजना अघि बढाउन ऊर्जा मन्त्रालयले तीन करोड रुपैयाँ बजेट विनियोजन गरेको छ।

Watch On

आयोजनाको अध्ययन, अनुसन्धान, वातावरणीय पक्षको विश्लेषण तथा प्रारम्भिक प्रक्रिया अघि बढाउन बजेट विनियोजन गरिएको हो। प्रतिनिधिसभाको अर्थ समितिका सभापति डा. कृष्णहरि बुढाथोकीको पहलमा आयोजना सरकारी योजनामा समावेश भएको जनाइएको छ।

आयोजनालाई शीघ्र अघि बढाउने विषयमा सभापति बुढाथोकीले शुक्रबार ऊर्जा, जलस्रोत तथा सिँचाइमन्त्री विराजभक्त श्रेष्ठसँग छलफल गरेका छन्। छलफलमा उनले विनियोजित बजेट प्रभावकारी रूपमा कार्यान्वयन गर्न र आयोजनासम्बन्धी अध्ययन तथा अनुसन्धानलाई तीव्रता दिन आग्रह गरे।

त्यसैगरी, वातावरणीय प्रभाव मूल्याङ्कन, सरोकारवाला निकायसँग छलफल तथा अन्तरक्रियाका कार्यक्रम अघि बढाउन र आयोजना कार्यान्वयनका लागि मन्त्रालयबाट आवश्यक पहल तथा सहजीकरण गर्न उनले मन्त्रीको ध्यानाकर्षण गराएका थिए।

प्रस्तावित आयोजना विद्युत् उत्पादनमा मात्र सीमित नरहने बहुउद्देश्यीय परियोजना हो। यसबाट विद्युत् उत्पादनसँगै सिँचाइ, खानेपानी आपूर्ति, पर्यटन प्रवर्द्धन, रोजगारी सिर्जना तथा स्थानीय आर्थिक गतिविधि विस्तारमा योगदान पुग्ने अपेक्षा गरिएको छ।

आयोजना निर्माण सम्पन्न भई सञ्चालनमा आएमा रामेछापको आर्थिक तथा सामाजिक विकासमा योगदान पुग्नुका साथै राष्ट्रिय ऊर्जा उत्पादन क्षमता बढाउन र लगानी विस्तार गर्न सहयोग पुग्ने अपेक्षा गरिएको छ।

सभापति बुढाथोकीले आयोजनालाई अध्ययनको चरणबाट कार्यान्वयनसम्म पुर्‍याउन निरन्तर पहल गर्ने प्रतिबद्धता जनाएका छन्।

तीन करोड रुपैयाँ विनियोजनसँगै आयोजना अघि बढाउने प्रारम्भिक प्रक्रिया सुरु गर्ने बाटो खुलेको छ। यद्यपि, आयोजनाको वास्तविक निर्माण प्रक्रिया अघि बढाउन विस्तृत अध्ययन, वातावरणीय प्रभाव मूल्याङ्कन, लगानीको स्रोत सुनिश्चितता र निर्माणसम्बन्धी निर्णय आवश्यक हुनेछ।