रास्वपाका २० नेता ११ दिने चीन भ्रमणमा जाँदै, नवप्रवर्तन र प्रविधि अध्ययन गर्ने

काठमाडौँ । सत्तारुढ राष्ट्रिय स्वतन्त्र पार्टी (रास्वपा) का महामन्त्री विपिनकुमार आचार्यको नेतृत्वमा २० सदस्यीय प्रतिनिधिमण्डल आइतबार चीन भ्रमणमा जाँदैछ।

Watch On

चिनियाँ कम्युनिस्ट पार्टी (सीपीसी) को निमन्त्रणामा चीन जान लागेको टोलीलाई पार्टी प्रवक्ता जगदीश खरेलले आइतबार बिहान ९ बजे त्रिभुवन अन्तर्राष्ट्रिय विमानस्थलबाट बिदाइ गर्ने कार्यक्रम छ। बिदाइअघि प्रवक्ता खरेलले सञ्चारकर्मीसँग समसामयिक विषयमा अन्तरक्रिया गर्ने रास्वपाले जनाएको छ।

आइतबारदेखि सुरु हुने भ्रमण ११ दिनको हुनेछ। भ्रमणका क्रममा प्रतिनिधिमण्डलले बेइजिङ, हाङचाउ र सिचुवानलगायत चीनका विभिन्न सहरको भ्रमण गर्ने कार्यक्रम छ।

आचार्य नेतृत्वको टोलीमा सहमहामन्त्री हरि ढकाल, संसदीय दलका उपनेता गणेश पराजुली र प्रमुख सचेतक कविन्द्र बुर्लाकोटीसहित २० जना छन्। टोलीमा सांसदहरू लिमा अधिकारी, समीक्षा बाँस्कोटा, सागर ढकाल, डा. आनन्दबहादुर चन्द, सुशान्त वैदिक, रिमा विश्वकर्मा, डा. धनञ्जय रेग्मी, श्रीराम न्यौपाने, डा. राम लामा, गजला शमिम मिकरानी, पुनम अग्रवाल, रत्ना थापा, डा. सुजाता तामाङ, पुष्पाकुमारी चौधरी, अरविन्द शाह र रमेश सापकोटा छन्।

भ्रमणको मुख्य चासो चीनले नवप्रवर्तन, कृत्रिम बुद्धिमत्ता र औद्योगिक विकासमा हासिल गरेको उपलब्धि अध्ययन गर्नु रहेको टोलीका सदस्यले बताएका छन् ।

उनका अनुसार चीनले विकास गरेका प्रविधि र अपनाएका नीतिलाई नेपालको आवश्यकता र क्षमताअनुसार कृषि आधुनिकीकरण, स्वास्थ्य सेवा, शिक्षा, सार्वजनिक सेवा प्रवाह, औद्योगिक उत्पादन र उद्यमशीलता विकासमा कसरी उपयोग गर्न सकिन्छ भन्ने विषयमा अध्ययन तथा विचार आदानप्रदान गरिनेछ।

भ्रमणले नेपाल र चीनबीच आपसी समझदारी तथा आत्मीय सम्बन्ध विकास गर्न सहयोग पुग्ने टोलीका सदस्यहरूले विश्वास व्यक्त गरेका छन् । भ्रमणबाट आर्थिक, प्राविधिक तथा विकासका क्षेत्रमा नेपाललाई दीर्घकालीन लाभ पुग्ने सहकार्यको आधार तयार हुने उनीहरूको भनाइ छ।

चीन भ्रमणमा जानुअघि प्रतिनिधिमण्डलका सदस्यहरूले प्रधानमन्त्री बालेन शाह र रास्वपा सभापति रवि लामिछानेसँग छुट्टाछुट्टै भेट गरेका थिए।