काठमाडौँ । कालिमाटी फुलफूल तथा तरकारी बजार विकास समितिको कृषक प्रतिनिधिमा गैरकिसानलाई नियुक्त गरिएको पाइएको छ । 

कृषि तथा पशुपन्छी विकास मन्त्री डा. बेदुराम भुसालले माघ २४ गते नियुक्त गरेका ३ जना किसान प्रतिनिधिहरु मध्ये एक जना काठमाडौँका स्थानीय शिक्षा व्यवसायी रहेको खुलेको हो ।

कृषि मन्त्रालयले बजार विकास समितिमा रिक्त रहेका ३ जना किसान प्रतिनिधिमा सिन्धुलीका कालिदास देवकोटा, काभ्रेका मिठाराम घिमिरे र काठमाडौँका शालिकराम खड्कालाई नियुक्त गरेको थियो ।

नियुक्ती पाएका ३ मध्ये काठमाडौँका खड्का मन्त्री भुसालका छिमेकी र पार्टीको सदस्य रहेकै कारण सिफारिस भएको भेटिएको हो । काठमाडौँ महानगरपालिका १४ कुलेश्वरका स्थानीय खड्का शिक्षण पेशासँगै शिक्षा क्षेत्रका व्यवसायी समेत हुन् । काठमाडौँमा जन्मे हुर्केका उनले आफू कृषककै छोरा भएको भन्दै आफूलाई गैरकृषक भन्न नमिल्ने जिकिर गरे । 

‘मेरो पुख्र्यौली घर धादिङको धुनिबेसी हो । मेरो पुर्खाले कृषि गर्नुहुन्थ्यो,’ खड्काले सिधाकुरासँग भने,‘अहिले पनि हाम्रो धादिङमा पुख्र्यौली कृषि फर्म छ । तर, म जन्मे हुर्केको भने काठमाडौँमै हो ।’

धादिङको धुनेबेशी नगरपालिका ६ गौचरणमा आफ्नो एक कृषि फार्म हाउस रहेको उनले दाबी गरे । धुनिबेसी नगरपालिकामा यसबारे बुझ्दा केही व्यापारीहरुको लगानीमा वडा नम्बर ६ मा ओरेन्ज एग्रो रिसोर्टमा खड्काले लगानी गररेको पाइएको छ । 

स्थानीय भतिजो सन्तोष खड्कासँगको साझेदारीमा खुलेको रिसोर्टमा उनको पनि सेयर रहेको र खड्काले रिसोर्टको काठमाडौँतर्फको मार्केटिङ हेर्ने गरेको नगरपालिका स्रोतले जनाकारी दियो । 

कालिमाटी बजार सञ्चालनका लागि सरकारले २०५८ सालमा गठन आदेश जारी गरेको थियो । गठन आदेशको दफा ३ ले कालिमाटी बजारमा व्यवसाय गर्ने व्यवसायीको तर्फबाट ३ जना प्रतिनिधि समितिमा रहने व्यवस्था गरेको छ । सोही दफामा टेकेर मन्त्रीस्तरीय निर्णयबाट खड्का लगायतको नियुक्ती भएको थियो । नियुक्तीको २ दिन पछि २६ माघमा उनीहरुको बजार विकास समितिमा बहाली भएको थियो । कालिमाटी फलफूल तथा तरकारी बजार विकास समिति अन्र्तगत ६२५ वटा पसलहरु सञ्चालनमा छन् ।