२२ भदौ, बर्दिबास - बर्दिबास अस्पतालमा प्रसूतिका लागि  गराइने शल्यक्रिया बन्द हुँदा गरिब र निम्न आय हुने परिवारका लागि समस्या भएको छ । तीन सातादेखि सेवा बन्द हुँदा गरिब र निम्न आय हुने सर्वसाधारणलाई प्रसूतिका लागि निजी अस्पताल वा टाढाको सरकारी अस्पताल धाउनुपर्ने हैरानी भएको हो ।

तीन सातायता सेवा बन्द भएपछि शल्यक्रिया गरिनुपर्ने यस्ता महिलालाई  चर्को शुल्क पर्ने निजी अस्पताल र टाढाको सरकारी अस्पताल जानुपर्ने बाध्यताले श्रमजीबि  परिवारका लागि खर्चको जोहो गर्न कठिन भएको पीडित कल्पना विक बताउँछिन् ।

अस्पतालले गत साउनमा शल्यक्रियाबाट बच्चा निकाले पछि आमाहरूमा एकपछि अर्कोमा गर्दै सङ्क्रमण बढ्दै गएकाले  यही भदौ १ गतेदेखि शल्यक्रिया बन्द गरेको हो । साउनमा शल्यक्रियाबाट सुत्केरी गराइएकामध्ये १० जनामा सङ्क्रमण देखिएकाले तत्काल यो सेवा बन्द गरिएको अस्पताल प्रशासनले स्वीकार गरेको छ तर शल्यक्रिया गरिनुपर्ने बाहेक अन्य सेवा भने यथावत रहेको अस्पतालका मेडिकल सुपरिटेण्डेण्ट डा कृष्णा महर्जन बताउँछन् ।

‘शल्यक्रिया गरिएका सुत्केरी आमामा सङ्क्रमण देखिन थाल्यो, त्यसैले त्यसको निदानपछि फेरि सेवा सुरु गर्नेगरी तत्काललाई शल्यक्रिया रोकिएको हो’, उनले भने । अस्पतालले गत साउनमा मात्रै दुई सयभन्दा बढी महिलालाई प्रसूति सेवा दिएकामा ८० जनाको शल्यक्रिया  गरिएको थियो । शल्यक्रिया गरिएकामध्येकै आठ देखि दश जनामा सङ्क्रमण  देखिएपछि भदौ १ गते देखि यो सेवा रोकिएको डा. महर्जनले बताए ।

शल्यक्रिया गरिएकामा सङ्क्रमण देखिन थालेपछि शल्यक्रिया कक्षको पानी  र  सुत्केरी सुताइने श्ययाको स्वाब परीक्षण गरिँदा जीवाणु भेटिएपछि उक्त सेवा बन्द गर्नु परेको अस्पताल प्रशासनले स्पष्ट पारेको छ ।  शल्यक्रियाकक्ष साँघुरो कोठामा सञ्चालन गरिएको र सरसफाइमा राम्रो ध्यान नदिँदा सुत्केरीमा सङ्क्रमण बढेको सर्वसाधारण बताउँछन् । 

‘अस्पतालले एकपछि अर्को सेवा थप्दै लगेपछि अब सरकारी अस्पतालमै राम्रो उपचार पाइने आश जागेको थियो’, अस्पताल नजिकैकी एक गृहिणी भन्छिन्, ‘तर अस्पतालको भर देखिएन ।’

साँघरो ठाउँमा आवश्यक सावधानी र सुरक्षाका उपाय अवलम्बनमा लापरवाही गरिँदा सङ्क्रमण बढेको स्वास्थ्यकर्मी बताउँछन् । साथै सङ्क्रमण बढ्नुको कारण र यसमा भएको लापरवाहीको खोजी गरि आवश्यक कारबाही गर्नुपर्ने सर्वसाधारणको माग छ ।