मुख्य समाचार

हैजा नियन्त्रणका लागि तीनै तहका सुरक्षाकर्मी र स्वास्थ्यकर्मी परिचालनः प्रधानमन्त्री

सिधाकुरा

शुक्रबार, भदौ १३, २०८२

हैजा नियन्त्रणका लागि तीनै तहका सुरक्षाकर्मी र स्वास्थ्यकर्मी परिचालनः प्रधानमन्त्री

काठमाडौँ । प्रधानमन्त्री केपी शर्मा ओलीले पर्सामा हैजा नियन्त्रणका लागि तिनै तहका सुरक्षाकर्मी र स्वास्थ्यकर्मी खटिएको बताएका छन् । आजको संसद बैठकमा सम्बोधन गर्दै प्रधानमन्त्री ओलीले हैजा नियन्त्रणका लागि सेना, प्रहरी र सशस्त्र प्रहरीमा कार्यरत स्वास्थ्यकर्मी, डाक्टरहरूलाई समेत परिचालन गर्ने निर्णय गरिएको जानकारी दिएका हुन् ।

प्रधानमन्त्री ओलीले भने, ‘आजै मात्र मन्त्रिपरिषद् बैठकले स्वास्थ्य मन्त्रालयको समन्वयमा नेपाली सेना नेपाल प्रहरी र सशस्त्र प्रहरीका नर्स, डक्टर र उपकरणको प्रयोग गर्ने निर्णय गरेको छ । यस रोगलाई सकेसम्म छिटो नियन्त्रण गर्न, बिरामी निको पार्न र बढ्न नपाओस् भनेर तीव्र ढंगले प्रयास भएको छ ।’

वीरगञ्जमा फैलिएको हैजाको स्रोत पत्ता लगाउन सरकारले प्रयास गरिरहेको भन्दै उनले हैजा नियन्त्रणमा लिन ध्यान केन्द्रीत गरेको बताए । उनले नारायणी अस्पतालमा विरामीको निशुल्क उपचार भइरहेको र निशुल्क औषधी उपलव्ध गराइएको उल्लेख गरे ।

अहिलेसम्म ६ सय २४ जनामा हैजा संक्रमण देखिएको, ४३७ जना निको भइसकेको र १८७ वटा सक्रिय केश रहेको प्रधानमन्त्रीले बताए । वीरगञ्जमा हैजाका कारण ३ जनाको मृत्यु भएको छ ।

प्रकाशित मिति: शुक्रबार, भदौ १३, २०८२

प्रतिक्रिया दिनुहोस्