२३ भदौ । धरान उपमहानगरपालिकाका मेयर हर्क साम्पाङले प्रश्न गरेको निहुँमा एक युवकलाई थुनाएका छन् । साम्पाङले अशोक लिम्बुलाई नगर प्रहरी लगाएर पक्राउ गराएका हुन् । लिम्बु अहिले इलाका प्रहरी कार्यालय धरानको हिरासतमा छन् । 

इलाका प्रहरी कार्यालय धरानका डिएसपी नवराज मल्लका अनुसार लिम्बुलाई नगर प्रहरीले पक्राउ गरेको हो । ‘नगर प्रहरीले पक्राउ गरेको रहेछ । उनीहरुले हामीलाई जिम्मा लगाए, अहिले उ हाम्रो नियन्त्रणमा छ ।’

डिएसपी मल्लले अहिलेसम्म कुनै उजुरी नपरेको पनि स्पष्ट पारे । मेयरमाथि दुव्र्यवहार भएको हो ? भन्ने प्रश्न मल्लले त्यस्तो केही जानकारीमा नआएको बताए । नगर प्रहरीले पक्राउ गरी बुझाएका कारण उनलाई हिरासतमा राखिएको उनको भनाई छ । 

यता धरानका मेयर हर्क साम्पाङले भने बदमासलाई प्रहरीको जिम्मा लगाएको बताएका छन् । उनले आफ्नो फेसबुकमा लेखेका छन्, ‘बदमासलाई प्रहरीको जिम्मा लगाइयो ! स्वतन्त्रताको नाममा अराजकता फैलाउने कसैलाई छाडिने छैन ! जय देश ! 

सामाजिक सञ्जालमै भेटिएको एउटा भिडियोमा एक युवकले मेयरको केही भनाभन भएको देखिएको छ । धरान १५ मा लागूऔषध सचेतना सम्बन्धी कार्यक्रममा ति युवकले एक घरमा बिरामीको अवस्था निकै नाजुक भएको र त्यसतर्फ ध्यान दिन मेयरलाई आग्रह गरेका थिए । तर मेयरले भने भने भाई चुप लाग भन्दै धम्क्याएका थिए । मेयरको फरक प्रस्तुतीपछि ति युवक पनि केही आवेगमा आएको देखिएका छन् । तर प्रश्न गरेकै भरमा नगर प्रहरी लगाएर पक्राउ गरी प्रहरी हिरासतमा राख्ने कार्यले लोकतन्त्रको उपहास भएको भन्दै मेयरको आलोचना भईरहेको छ ।