२९ भदौ, चितवन । चितवनको भरतपुर भरतपुर महानगरपालिका प्रमुख रेनु दाहालले गौतम बुद्ध अन्तरराष्ट्रिय क्रिकेट रङ्गशालाको बाँकी निर्माणको काम महागनरले पूरा गर्ने बताएकी छिन् । आज नारायणी किनारमा भएको सरसफाइ तथा वृक्षरोपण कार्यक्रममा उनले जनस्तरबाट भएको चासो र चिन्तालाई आफूले मनन गरेको जनाउँदै जसरी भए पनि रङ्गाशाला बनाउने प्रतिवद्धता व्यक्त गरेकी हुन् । उनले भनिन्, ‘हामीलाई पटक–पटक जनस्तरबाट खबरदारी भएको छ, रङ्गशाला के हुँदै छ भन्ने आम रुपमा जनतामा चासो र चिन्ता छ, महानगर प्रमुखले अल्लि अस्ति नै बनाउने भन्नुभएको थियो निर्माणको काम कहाँ पुग्यो भन्ने जनतामा प्रश्न छ । म यही कार्यक्रममार्फत भन्न चाहन्छु गौतम बुद्ध अन्तरराष्ट्रिय क्रिकेट रङ्गशाला बन्छ हाम्रै पालामा तपाइँहरु ढुक्क रहनुस् ।’

रङ्गशाला निर्माण पूरा गर्न ठूलो आकारको ऋण तिर्नुपर्ने भएको र सरकारले ऋण तिर्ने भन्ने पहिला कुनै सम्झौता नभएको हुँदा निर्माण प्रक्रिया अगाडि बढाउन मुस्किल भएको दाहालको भनाई छ । महानगर प्रमुख दाहालले गत आर्थिक वर्षको अन्त्यमा नेपाल सरकारको रु १२ करोड बजेट आएको तर एक हप्ता पनि समय नहुँदा बजेट फिर्ता पठाइएको बताउँदै छिट्टै त्यो बजेट पुनः आउने आश्वासन दिइन् । 

रङ्गशाला निर्माणका लागि महानगरपाललिकालाई तत्कालै अरबौँ बजेट जुटाउन समस्या हुने हुँदा चरणबद्ध ढङ्गले काम अघि बढाउँदै  र बनेका संरचना संरक्षण गर्दै लैजाने दाहालको भनाइ छ । उनले रङ्गशालालाई खेल्न लायक ठाउँ बनाउनका लागि महानगरपालिकाले विभिन्न प्रक्रिया पूरा गरी बागमती प्रदेश सरकारसँगको साझेदारीमा छिट्टै काम अघि बढाइने जानकारी दिइन् । 

धुर्मुस–सुन्तली फाउन्डेसनले निर्माणका क्रममा लागेको ऋण तिर्न नसकेपछि रंगशाला निर्माणबाट हात झिकेको थियो । नेपाली क्रिकेट टोली विश्वकप छनोट खेलका लागि छनोट भएपछि उनले सामाजिक सञ्जालमा रंगशालाको सम्बन्धमा छिट्टै खुशिको खबर सुन्न पाइने उल्लेख गरेकी थिइन् । तर हालसम्म पनि खुशीको खबर सुन्न नपाएको भन्दै प्रमुख दाहालको आलोचना हुने गरेको छ । अहिले उनले छिट्टै रंगशाला बन्ने दाबी गर्दैगर्दा नागरिकहरुले भने पत्याएका छैनन् ।