राजीनामा खल्तीमा छ भन्ने रास्वपा मन्त्रीहरुको भनाईलाई अन्यथा लिएको छैनः प्रधानमन्त्री प्रचण्ड

चितवन । प्रधानमन्त्री पुष्प कमल दाहालले रास्वपाका नेताहरूले राजीनामा गोजीमा राखेकोबारे दिएका अभिव्यक्तिबारे अन्यथा नलिएको बताएका छन् । सोमबार चितवनको भरतपुर विमानस्थलमा सञ्चारकर्मीसंग कुराकानी गर्दै प्रधानमन्त्री प्रचण्डले रास्वपाबाट मन्त्रीहरुले सुरुदेखि नै यस बिषयमा बोलिरहेकाले अन्यथा नलिएको बताएका हुन् । 

Watch On

राष्ट्रिय स्वतन्त्र पार्टीबाट युवा तथा खेलकुद मन्त्री बनेका विराजभक्त श्रेष्ठले केही दिनअघि सरकारबाट कुनैपनि बेला बाहिरिन सक्ने संकेत गर्दै राजीनामा खल्तीमा बोकेर हिँडेको अभिव्यक्ति दिएका थिए । अन्य मन्त्रीहरुले पनि बेला बेला यस्ता अभिव्यक्तिहरु दिईरहेका हुन्छन् । तर विराजभक्त श्रेष्ठको अभिव्यक्तिपछि गठबन्धनमा खटपट सुरु भएको धेरैले अनुमान लगाएका छन् । सोही सन्दर्भमा संचारकर्मीले सोधेको प्रश्नमा प्रधानमन्त्रीले आफूले अन्यथा नलिएको बताएका हुन् । 

अहिलेको समीकरण राम्रैसँग अगाडि जाने भन्दै प्रधानमन्त्री प्रचण्डले उथलपुथल गर्ने बेला नभएको धारणा राखे । त्यस्तै प्रधानमन्त्री प्रचण्डले तीनवटै सुरक्षा प्रमुखहरूसँग आफूले केही दिनअघि छलफल गरेको र केही परिवर्तन नहुने भएकोले ढुक्कसँग काम गर्न भनेको पनि जानकारी दिए । 

त्यस्तै प्रधानमन्त्री प्रचण्डले जनताको अपेक्षा अनुसार अझै गति दिन आवश्यक रहेको बताएका छन् । सरकारका कामकारबाही समग्रमा सन्तोषजनक र राम्रो नै रहेको भन्दै अझै गति दिनुपर्ने बताएका हुन् । 

उनले जनता र राष्ट्रका पक्षमा नीति तथा कार्यक्रम र बजेट प्रस्तुत भएको पनि बताए । प्रधानमन्त्री दाहालले बजेटका बारेमा एमालेको पनि कुनै असन्तुष्टि नरहेको जिकिर गरे ।