विद्यालय बन्द नगर्न बालेनको आग्रह, निर्देशन नमान्ने प्रधानाध्यापकहरुको निर्णय

३ असाेज, काठमाडौं : काठमाडौं महानगरपालिकाका मेयर बालेन शाहले पनि शिक्षा विधेयक स्विकार गर्न नसकिने बताएका छन् । 

Watch On

शिक्षा विधेयकको विरोधमा देशभरका शिक्षक काठमाडौंमा आएर आन्दोलनरत रहँदा बालेनले पनि बुधबार साँझ फेसबुकमा एक स्टाटस लेख्दै सबै भूगोलको लागि एकै किसिमको शिक्षा ऐन जारी हुँदा आफ्नो पनि असहमति रहेको बताएका हुन्।

उनले लेखेका छन्, ‘झन्डै २ लाख ५० हजार हजार विद्यार्थी र दश हजारभन्दा धेरै शिक्षक हाम्रो मातहतमा छन्,आधारभूत र माध्यमिक शिक्षा स्थानीय सरकारको एकल अधिकारको रूपमा रहेकोले विद्यालय शिक्षा ऐन बनाउने अधिकार पनि स्थानीय सरकारमा निहित रहेको छ।’

त्यस्तै उनले भुगोलअनुसारको आवश्यकता हुने भएकाले सोहीअनुरुपको शिक्षा नीति हुनुपर्ने बताएका छन् । 

‘काठमाडौं र जुम्लाका आवश्यकता फरक छन्। सोही अनुरूप शिक्षा नीति फरक हुनुपर्छ’ उनले भनेका छन्। 

उनले संघीय तहले प्रस्तुत गर्नुपर्ने विधेयक संघीय संसदमा दर्ता गर्नु नै संविधानको बर्खिलाप भएको बताएका छन् । त्यस्तै उनले संघीय सरकारले संघीय शिक्षा ऐन तर्जुमा गरी राष्ट्रिय शिक्षा नीति तथा मापदण्ड बनाउनुको साटो विद्यालय शिक्षा विधेयक ल्याउनु संवैधानिक प्रावधान विपरीत रहेकोले स्वीकार गर्न नसकिने बताएका छन् । 

यसैगरी उनले शिक्षा विधेयकमा असन्तुष्ट भएता पनि शिक्षकले स्कुल बन्द गरेर पठनपाठनमा अवरोध नपुर्याउन अनुरोध समेत गरेका छन्। 

यता काठमाडौंकै प्रधानाध्यापकहरुले भने विद्यालय बन्द गरी माइतिघर मण्डलामा नियमित आन्दोलन गर्ने निर्णय गरेका छन् । उनीहरुले एक विज्ञप्ती जारी गर्दै अर्को सूचना नभएसम्मका लागि काठमाडौं महानगरपालिकाका सम्पूर्ण सामुदायिक विद्यालय बन्द गरी आन्दोलनमा उपस्थित हुने जनाएको छ । साथै आन्दोलनका क्रममा विद्यार्थीलाई पुग्ने शैक्षिक क्षतिप्रति संवेदनशील हुँदै क्षतिलाई परिपूर्ति गर्न बिदाका दिनमा पठनपाठन गरिने प्रतिबद्धता व्यक्त गरिएको छ ।