नेकपा माओवादी केन्द्रका अध्यक्ष पुष्पकमल दाहालले पार्टीलाई सक्षम र सवल बनाउनका लागि शुद्धिकरण अभियान चलाउनुपर्नेमा बताएका छन् । 

पार्टी कार्यालय पेरिसडाडाँमा शनिबार बसेको पार्टी स्थायी कमिटी बैठकमा बैचारिक, राजनीतिक र सांगठानीक बिषयमा धारणा राख्दै प्रचण्डले संसदीय परिपाटीबाट प्रदूषित भएको भन्दै शुद्धिकरण अभियान चलाउनुपर्नेमा जोड दिएको प्रवक्ता अग्नि सोपकोटाले बताए 

बैठकमा प्रचण्डले बिगतका अनुभवको अध्ययन गर्दै नयाँ बहसमा ध्यान दिनुपर्ने र नयाँ बैचारिक संश्लेषण गर्दै पार्टीलाई नयाँ ढंगले सुदृढिकरण गर्नुपर्ने धारणा राखेका थिए ।

 त्यस्तै प्रचण्डले स्पष्ट नीति, योजना नयाँ कार्यक्रम सहित जनतामा जानुपर्नेमा जोड दिनुभएको प्रवक्ता सापकोटाले बताए ।

कम्युनिष्ट बामपन्थीहरुलाई एकतावद्ध गर्नका लागि समाजवादी मोर्चामा आवद्ध दलहरुसंग कुराकानी भइरहेको भन्दै प्रचण्डले छिटै परिणाम निस्कने समेत धारणा राखेको सापकोटाले जानकारी दिए। बैठकमा प्रचण्डका साथै उपाध्यक्ष नाराणकाजी श्रेष्ठ, उपमहासचिव बर्षमान पुन लगाएत १३ जना सदस्यहरुले धारणा राखेका थिए । 

बैठक आइतबार पुनः बस्ने सापकोटाले जानकारी दिनुभयो । जनपरिचालन, सङ्गठन निर्माण र विस्तार लगाएतका एजेण्डमा केन्द्रीत माओवादीले स्थायी कमिटी बैठकपछि केन्द्रीय कमिटी बैठक बोलाउने तयारी गरेको छ ।