सबै कुरा

भ्रष्टाचार आराेपीलाई अख्तियारमा मुद्दा दर्ता हुनेवित्तिकै निलम्बन गर्ने नियमको विपक्षमा प्रचण्ड

सिधाकुरा

बिहीबार, साउन ३१, २०८१

भ्रष्टाचार आराेपीलाई अख्तियारमा मुद्दा दर्ता हुनेवित्तिकै निलम्बन गर्ने नियमको विपक्षमा प्रचण्ड

काठमाडौँ । पूर्व प्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल प्रचण्डले अख्तियार दुरुपयोग अनुसन्धान आयोगमा मुद्दा दर्ता हुनेबित्तिकै निलम्बन गर्न नहुने राय दिएका छन् । राज्य व्यवस्था तथा सुशासन समितिले बिहीबार भ्रष्टाचार निवारण ऐन संशोधन विधेयकमाथिको छलफलका क्रममा उनले यस्तो बताएका हुन् ।

उनले भने, ‘आयोगले मुद्दा गर्नेवित्तिकै पदबाट निलम्बन गर्ने कुरा ठिक छ कि छैन ? अदालतले अन्तिम कसुरदार हो भन्ने फैसला नगरेसम्म त त्यो विषय टुङिगएको त हुँदैन । त्यो अवस्थामा हामीले के देख्यौँ विगतमा पनि आयोगले मुद्दा दर्ता गर्छ, पदाधिकारी निलम्बित हुन्छन् । केही महिनापछि अदालतले फैसला गर्छ, उ निर्दोष छ । त्यो बिचको क्षतिपूर्ति के भन्ने पनि एउटा पक्ष भयो । अर्को आयोगले मुद्दा दर्ता गर्यो निलम्बित भयो, अदालको फैसला बिलम्बित भयो । उ रिटायर्ड हुने परिस्थिति बन्यो । त्यसपछिको एउटा जटिल परिस्थिति हामीले समना गरेकै छौँ ।’

उनले हदम्यादमा बिषयमा बिभिन्न कोणबाट कुरा आइरहेको भन्दै हदम्याद राख्ने वा नराख्ने भन्ने बिषयमा प्रयाप्त छलफल गर्दै निष्कर्षमा पुग्नुपर्ने बताए । उनले विधेयकलाई अघि बढाउदै गर्दा अख्तियारको भूमिकालाई पनि थप स्पष्ट पार्नुपर्ने आवश्यकता औल्याए ।

आयोग र कर्मचारीतन्त्रबीचको अन्तरविरोधले शासन व्यवस्थालाई नै असर पारेको अनुभव रहेको भन्दै प्रचण्डले यस बिषयमा पनि थप छलफल आवश्यक रहेको बताए ।

प्रचण्डले शासन प्रणाली र नियमक संरचनाहरुमा परिमार्जन र सुधार गर्नुपर्ने धेरै बिषयहरु रहेको उल्लेख गरे । अहिले सूचना प्रविधिमा देखिएको विकाससंगै समयानुकुल भ्रष्टाचार नियन्त्रण गर्न विधेयकलाई पूर्ण बनाउनुपर्ने समेत उनले सुझाव दिए ।

प्रकाशित मिति: बिहीबार, साउन ३१, २०८१

प्रतिक्रिया दिनुहोस्