नेकपा एमालेका अध्यक्ष केपी ओलीले महानगरबाट गरिबलाई नभई, गरिबीलाई लखेट्नु पर्ने बताएका छन् ।

फेसबुकमा स्टाटस राख्दै ओलीले काठमाडौँका मेयर बालेन्द्र शाह र अभियन्ता ईः लाई वार्ताबाट समाधान खोज्न समेत आग्रह गरेका छन् । साथै ओलीले उपमेयर सुनिता डङ्गोलले भेटेर वार्ताबाट समाधान खोज्ने संकेत गरेको दाबी गरेका छन् ।

साथै ओलीले परम्परागत रुपमा चल्दै आएका कुरालाई एक्कासि परिवर्तन गर्न खोज्दा खलबली हुनु स्वभाविक र वैज्ञानिक भएकाले छलफलबाट समाधान निकाल्न सुझाएका हुन् । उनले लेखेका छन् "हो, फुटपाथ हिँड्नकै लागि हो।

पैदल यात्री सहज रूपमा हिँडून् भनेर नै फुटपाथ बनाइएको हो। यसमा कसैको दुईमत छैन होला, मेरो पनि छैन। कुरा परम्परा देखि फुटपाथमा रोजिरोटीका लागि गुजरा व्यापार गरिरहनु भएका मानिसहरूको व्यवस्थापन कसरी गर्ने भन्ने मात्रै हो।

फुटपाथ (सडक) व्यापार हाम्रो परम्परागत नेवारी व्यापार संस्कृतिको अंश पनि हो। असन, इन्द्रचोक, भोटाहिटीतिर ५० औं वर्ष अघिदेखि यस्तो चलेको हामीले देखेका थियौं ।

पुराना किताब, इतिहास र कथाहरूमा असन, इन्द्रचोकको व्यापारका विषयमा पढ्न पनि पाइन्छ । हो, अहिले परम्परागत रुपमा चल्दै आएको कुरालाई एक्कासि परिवर्तन गर्न खोज्दा केही खलबली हुनु स्वभाविक र वैज्ञानिक (Theory of Inertia) पनि हो । उपमेयरले भेट्नु भएको भन्ने सुनें। यो वार्ताबाट समाधान खोज्ने संकेत हुन सक्छ ।

दुबै युवा हुनुहुन्छ, छलफल गर्नुहोस्, समाधान निकाल्नुहोस् । हामीले महानगरबाट गरिबी लखेट्नु पर्छ, गरिब होइन । समाधानको उपाय के हुन सक्छ, तपाईँहरूको विचार पनि राख्नुस् है ! धन्यवाद !"