‘नगर प्रहरी कुटेपछि गङ्गालाल अगाडि धकेलाधकेल भयो’ - राजुनाथ पाण्डे

काठमाडौँ । काठमाडौँ महानगरपालिकाका प्रहरी बलका प्रमुख एसएसपी राजुनाथ पाण्डेले आइतबार गङ्गालाल अस्पतालअघि महानगरको प्रहरीमाथि हातपात भएको बताएका छन् । 

सामाजिक सञ्जालमा भाइरल भएको एक भिडियोबारे सिधाकुराले राखेको जिज्ञासामा प्रहरी प्रमुख पाण्डेले यस्तो दाबी गरेका हुन् । सहिद गङ्गालाल अस्पताल महाराजगञ्जको सडकमा  महानगर प्रहरी बलका आधा दर्जन प्रहरीले एक युवकलाई लछारपछार गरेको भिडियो सामाजिक सञ्जालमा भाइरल भइरहेको छ । 

अस्पतालको गेटमा चुरोट, खैनी लगायतका वस्तुको बिक्री गरेर फोहोर गरेको अस्पताल प्रशासनको गुनासोपछि प्रहरी पुग्दा प्रहरीमाथि हातपात भएको उसलाई नियन्त्रणमा लिन प्रयास गर्दाको भिडियो सामाजिक सञ्जालमा फैलाइएको पाण्डेले दाबी गरे । ‘भिडियोमा एक पक्षीय छ ।  प्रहरीमाथि हातपात भएको विषय देखिंदैन,’ एसपी पाण्डेले भने, ‘अस्पतालले आफ्नो हाता फोहोर गरेको गुनासो हरेक दिन टिपाएपछि हामीले सो क्षेत्रमा फोहोर नगर्न भनेका हौँ । नगर प्रहरीमाथि कुटपिट भएपछि सो कार्य गर्नेलाई नियन्त्रणमा लिन खोजिएको हो ।’ उनले घटना सम्बन्धमा यथार्थ विवरण पेश गर्न मातहतको इकाईलाई लिखत पत्राचार गरिएको पनि बताए । 

महानर प्रहरी बलका प्रमुख एसएसपी राजुनाथ पाण्डेसँगको कुराकानीको सम्पादीत अंश:    

गंगालाल अस्पतालको गेटमा सुर्तिजन्य पदार्थ चुरोट, खैनी लगायत बिक्री गरेको र अस्पताल परिसर फोहोर गरेको भनेर हरेक दिन गुनासो टिपाएको पाइयो ।

त्यसपछि महानगर प्रहरी बलले अस्पताल क्षेत्र वरपर सुरक्षा  निगरानी बढाएको थियो । त्यसै क्रममा आइतबार बिहान अस्पतालको हातामा चिया, चुरोट र सुर्ती बेच्नेहरुलाई निषेध गर्न महानगर प्रहरी बल पुगेको थियो ।

सो क्रममा चिया बेच्ने एक जना आमाको सुरक्षाका लागि गेटमा बसेका युवक र महानगर प्रहरी बलबीच धकेलाधकेल भएको हो । 

खासमा ति व्यक्ति महानगर प्रहरी बललाई प्रतिकार गर्न त्यहाँ बसेका थिए । प्रहरीले चिया, चुरोट बेच्नेलाई हट्नुस् भन्ने बितिक्कै उनले प्रहरीमाथि आक्रमण गरेका थिए । ति व्यक्तिको आक्रमणबाट नगर प्रहरीको लुगा च्यातिएको छ ।  उनलाई नियन्त्रणमा लिन खोज्दा केहीबेर धकेलाधकेल भएकै हो । 

महानगर प्रहरी बल नागरिक माथि धरपकड र अभद्र व्यवहार गर्नका लागि खटिएको होइन । तर, यहाँ विषयान्तर गर्न र हामीलाई बदनाम गराउन एकपक्षीय भिडियो खिचेर सामाजिक सञ्जालमा प्रसार गरिएको छ । त्यहाँ प्रहरीमाथि भएको कुटपिटको विषय नै छैन् । हामीले नियन्त्रणमा लिएका ति युवकलाई छोडिदिएका छौँ । 

यो प्रकरणमा थप विस्तृत विवरणका लागि हामीले त्यहाँ रहेको हाम्रो डीएसपी कमान्डको नेतृत्वलाई लिखत रुपमा स्पष्टीकरण पनि माग गरेका छौँ ।

म फेरि पनि भन्न चाहन्छु महानगरको नीति नियम लागू गराउन महानगर प्रहरी बल खटिएको हो । हामी हाम्रो नियम पालना गराउन तत्पर छौँ । हाम्रो कामलाई सघाउन हामी सबैलाई आह्वान गर्दछौँ । नगर प्रहरीले नागरिकलाई हतोत्साही गर्ने, हातपात गर्ने जस्ता कार्य गर्दैन । कसैले गलत गरे त्यस्तो गर्ने प्रहरीलाई पनि कारबाहीको दायरमा यस अघि पनि ल्याएका छौँ । अब पनि ल्याउँछौँ । तर, महानगरका काम कारबाहीबाट अत्ताएिर हामीमाथि अपवाहपूर्ण गलत ढंगले प्रहार नगरियोस् भन्नेमा म सबैसँग अनुरोध गर्दछु ।